বি জে পিনা লুচিংবা সেন্টরগী নেসনেল দেমোক্রেটিক এল্লাইন্স ( এন দি এ) অসিগী হৌখিবা চহী তরাগী মতমদা এনফোর্সমেন্ট দিরেক্তরেট ( ঈ দি) না লূপা ক্রোর ২,২০০ হেন্না ফাগৎপা ঙমখ্রে হায়না প্রাইম মিনিষ্টর নরেন্দ্র মোদিনা ফোঙদোকখ্রে। কংগ্রেস পার্টিনা লুচিংবা সেন্টরগী য়ুনাইটেদ প্রোগ্রেসিভ এল্লাইন্স (য়ু পি এ) মতমদা প্রাইম মিনিষ্টর মনমোহনগী লৈঙাক না চহী তরাগী সাসন তৌরিঙৈদনা শুপ্নতংগী লূপা লাখ ৩৪ খক ফাগৎপা ঙম্লমখি হায়না নরেন্দ্র মোদিনা মখা তাখি।
পাউগী এজেন্সি অমগা উন্নবদা নরেন্দ্র মোদিনা হায়, মহাক্কি এন দি এ লৈঙাক লাকপদগী শেঞ্জা-থুমজাগী মায়োক্তা অকনবা মীৎয়েং চঙশীল্লক্লি। শেঞ্জা-থুমজাগী থবকশিংদা চেন্নরম্বা খূদিংমক করিগুম্বা অমত্তদা কমপ্রোমাইজ তৌরোই। মশা-মশাগী মরাল মতূং ইন্না ফংফম থোকপা চৈরাক ফংহনগনি হায়খি।
মমাঙগী এসেমব্লি মীখলদা বেঙ্গলদা বি জে পিনা সিট অহূম ফংখি। অদূম ওইনমক হন্দক্কি লোক সভাগী মীখল অসীদদি বেঙ্গলদা বি জে পি চাউনা মায় পাক্কনি হায়না এজেন্সিগা উনখিবা অদুদা মোদিনা ফোঙদোকখি। হৌজিক লৈরিবা এন দি এগী লৈঙাক অসীনা শেঞ্জা-থুমজাগী থবকশিংদা চেন্নরম্বা খূদিংমক করিগুম্বা অমত্তদা ঙাকপীবা ঙম্লোই হায়না নরেন্দ্র মোদিনা মখা তাখি।
