মনিপুরগী মফম অয়াম্বদা হৌখিবা নুমিৎ হুম্নি-মরীনি চূপ্না অহীং-নুংথিল অনীমক্তা অকনবা নোং লেপ্ত না হৈথরকপদগী অনেম্বা তম্পাক্কি মফম কয়াদা নৌহৌননা ঈশীং থুমজীনখ্রে। চীঙগী মফম কয়াদা লেন্দস্লাইদকি থৌদোক কয়া থোকপদগী নেস্নেল হায়ৱে নম্বর ৩৭,ইম্ফাল জিরি লম্বী থিংজিনখিবদগী মাল পুবা অমসুং পেসেঞ্জর গারি পূম্নমক লেপখিবদগী মীয়ামগী মহৌশাগী পুন্সিদা চাউনা অকায়বা থোকলি।
নাকল অমরোমদনা, অকনবা নোংনা মরম ওইদুনা তুরেল অয়াম্বগী ঈশীংগী ঈমায় ৱাংখৎলকপগা লোয়ননা খুদোংথীনিঙায় ওইবা থাক য়ৌরে। লোকতাক পাৎকি ঈশীং ঈমায় ৱাংখৎলকপগা লোয়ননা পাৎ অসীগী মপান্দা খুন্দারিবা মীয়াম খুদোংচাদবা কয়া মায়োক্নরক্লি।
লেন্দস্লাইদকি অমসুং মদস্লাইদকি থৌদোক কয়া থোকপদগী নেস্নেল হায়ৱে নম্বর ৩৭ গী মফম অয়াম্বদা গারিশিং চত্থোক চৎশীন অমত্তা য়াখিদ্রে। নেস্নেল হায়ৱে ইনফ্রাষ্ট্রকচর দিভলপমেন্ট কোরপোরেসন লিমিটেদনা লম্বী শেংদোকপগী থবকশিং হেভি মেচিন্নরিশিং শীজিন্নদুনা পায়খৎলি। অদূম ওইনমক মফম কয়াদা চীঙ নীঙখায়রকখিবা মরম্না লম্বীশিং অসীগী শরুক্তা মপূংফানা শেংদোক্নবা হোৎনবদা নুমীৎ খরনিগী মতম চঙখিগনি হায়না ফোঙদোরক্লি।
