ইম্ফাল জিরিবাম লম্বীগী নেস্নেল হায়ৱে অসিদা মতম কয়াগী মমাঙদগী এন্টি-নেস্নেল ইলিমেন্ট কয়ানা অপনবা পীদুনা পেসেঞ্জর কয়াগী মপোৎ-মচৈ মৎপীবা, অয়াওবা শেল অমসুং অতৈ পোৎলমশিং মুনবিবা, রেন্সম তাননবা হোৎনদুনা মী ফাবা, দ্রাইভর, হেন্দিমেনশিং ফাদুনা হাৎপফাও য়াওবগী মথক্তা মীয়ামগী তঙায়ফদনা চঙবা পোৎলমশিং পুদুনা চৎলিবা গারিশিংদা বোম অমসুং নোংমৈ কাপশীন্দুনা অশোক- অপন, মীশী-মীনা কয়ামরুম ঙাইহাক লৈতনা চত্থরকপদগী ষ্টেট অসীগী লো এন্দ ওর্দরদা চাউনা চৈথেং পীরক্লবসু লৈঙাক অসিনা মপূংফানা অথীংবা পীবা ঙমদনা লৈরি।
নেসনেল হায়ৱে প্রোটেক্সন ফোর্স থম্ননবা ৱাফম সিভ সেনাগী মায়কৈদগী ষ্টেট অমসুং সেন্টর লৈঙাক্কি মফমদা ঙসীদগী চহী কুন-কুন্থরাগী মমাঙদগী হৌনা মীয়ামগী অমসুং ষ্টেট অসিগী ইন্টরেষ্টতা তকশীন্দুনা লাক্লি অদুবু লৈঙাক্না থবক পায়খৎপা লৈত্রি। মরম অসিনা সিভ সেনা মনিপুরনা মসীগা ৱাখল্লোন মান্নবশিংগা খূৎশম্নরগা নেসনেল হায়ৱে অসিদা ভল্লন্টরিলি ঙাক শেনবগী থৌদাং লৌদুনা লমদম অসীগী মীয়ামগী পুন্সি অমসুং লন-থুম ঙাক শেল্লগনি হায়না সিভ সেনা মনিপুর য়ুনিটকি প্রসিদেন্ট দাঃ এম তোম্বীনা লাউথোকখ্রে।
চিন-কুকি মিলিটেন্টশিংনা মীটৈ কম্যুনিটিদা ওন্সীন্দুনা নোংমৈ কাপশিনবা, বোম লংশিনবা, নেসনেল হায়ৱেশিংদা ঙাইহাক লৈতনা কুশি তৌদুনা থিংদোক-থিংজিন তৌদুনা মনীং তম্না শান্নরিবসি য়াহন্দনবা হোৎনরগনি। হীরম অসিদা পার্টি অসিনা য়াম্না হকচীন্না লৌই হায়না ফোঙদোকখি।
