নরেন্দ্র মোদি অসি বি জে পিনা ৱাংনা থাঙ্গত্তুনা দিক্তেটর ওইহন্ননবা তৌরি, দেমোক্রেসিগী ৱাহন্থোক অমত্তা লৈরক্লোইদৌরি: মালিকার্জুন খরগে

লাইনীং লম্বী থিদুনা, তাইবং শেম্বা মপূ মহাকপু অমূক্তং উজগে, ফংজগে হায়না তপস্যা, ধ্যান তৌদুনা পূক্নীঙ-ৱাখল লূপচদুনা লৈখ্রবা মীওইশিংগী ওইনদি মপূ মহাক্কি থৌজাল ফংজদুনা অরান-খুভম ফংজৈ হায়নৈ অদুগা পোলিটিক্স তদি মীওই অমবু খম থেংনা ৱাংখৎহন্দুনা, পোঙথোক-চাউথোকহন্দুনা, মীয়াম্না পঙথা-থাগত্তুনা অসুম নোল্লুকপা মতৌ কা-হেন্না ঊৎলুরবদি মহাক্তুনা হায়রিবা, তৌরিবা খূদীঙমক মীয়াম্না করিশু অয়েৎপা পীবা ঙম্লরোই হায়বা ৱাখল্লোন্না লমজীঙখিবদগী মশাগী অনীঙবা-অপাম্বা খূদীঙমক পঙতৌ তৌরক্তুনা দিক্তেটর অমগী থাক্তা হাইগৎলকপা মশানা তাবনি হায়না কংগ্রেস প্রসিদেন্ট মল্লিকার্জুন খরগেনা ফোঙদোকখ্রে।

দিক্তেটরশিপকি সাসন্দা দেমোক্রেসিগী ৱাহন্থোক অমত্তা লৈতে, চন্নফম লৈতে। দেমোক্রেসি অমদি কন্সটিট্যুস্নেল মেচিন্নরিশিং মূৎখিবা ময়েক্না তারবা ৱাফম অমনি হায়না রাজ্য সভাদা কন্সটিট্যুসনগী মতাংদা চত্থখিবা খন্ন-নৈনবা থৌরম অমদা ওপ্পোজিসন লিদর মল্লিকার্জুন খরগেনা ফোঙদোক্লদুনা বি জে পি অমসুং প্রাইম মিনিষ্টর নরেন্দ্র মোদিদা অকনবা এত্তেক তৌশিনখিবনি। বি জে পি কাঙবূনা লৈবাক অসীদা নরেন্দ্র মোদিবু দিক্তেটর ওইহন্দুনা, মখোয়না অনীঙবা অপাম্বখক মনীঙ তম্না চত্থবা য়াননবা হোৎনরি। দিক্তেটরশিপ হায়বা অসিদদি দেমোক্রেসিগী চন্নফম অমত্তা লৈতে।

বি জে পি অমসুং আর এস এসনা, কন্সটিট্যুসন শেম্বদা খ্বায়দগী মরূওইবা থৌদাং লৌরম্বা দা. ভিম রাউ অম্বেদকরবু ঈকায় খুম্নদ্রিবসি মীয়াম্না খঙনরবনি হায়না অকনবা ৱাফম কয়া হাওসতা থমখি। পার্টি অসীনা কন্সটিট্যুসনগী প্রিন্সিপলশিং খোঙ্গোয়নরি অদুগা নরেন্দ্র মোদিবু কা হেন্না থাগত্তুনা ভক্তি তৌরিবসি দিক্তেটরশিপ চল্লাইদুনা লৈবাক অসী মথক-মখা ওন্থোক্ননবা হোৎরক্লিবনি হায়না খরগেনা ফোঙদোকখি।