কামজোং এরিয়াদা চঙজফম পীদুনা থম্লিবা অমসুং আইনগী ৱাংমদা অরোনবা মওংদা নৌনা চঙশীল্লকপা ম্যান্মার রিফ্যুজিশিংনা মফমশিং অদুগী খুঞ্জাশিংগী লৈফমদা চঙশীল্লক্তুনা মীওই কয়া হাৎপা, ফূবা অমসুং কিদনেপ তৌদুনা কা হেনবা মীওৎ মীনৈ চত্থরক্তুনা হীংশা কয়ামরুম চত্থরক্লে। মসীনা মরম ওইদুনা লমদম অদোমগী খুঞ্জাশিং লৈফম-চাফম খঙনদ্রে,খুঞ্জাশিং শাফগদবা মফম কয়াদা লাঞ্জেন্নরকপা য়াবগী থাক্তা লৈরে। হীরম অসিগী মতাংদা চিফ মিনিষ্টর নোংথোম্বম বিরেন্না অকনবা মীৎয়েং চঙবিদুনা ম্যান্মার রিফ্যুজিশিং অসি খুদক্তা তকথোকপিয়ু হায়না ফুংয়ার কেন্দ্রগী এম এল এ লৈসিও কৈশীংনা চিফ মিনিষ্টরদা অইবা চেরোল লানখত্তুনা মীৎয়েং চিংশিনখ্রে।
কামজোং মায়কৈদা হৌজিক ম্যান্মারদগী লোন্না অমসুং ফোংনা চঙশীল্লক্তুনা লৈরিবা রিফ্যুজিশিং গী মশীং অসি ৫৮০০ হেনখ্রে। মখোয়গী মনুংদা বাইওমেত্রিক রেকোর্ড তৌরবা মীওইশিংগী মশীংনা ৫১৭৩ নি। রিফ্যুজিশিং অসিদা দিষ্ট্রিক্ট এদমিনিষ্ট্রেসন্না চাং নাইনা রেসন অমসুং অতৈ অতৈ তঙায়ফদনা নোংমদা চঙবা পোৎলমশিং পীরিবনি। কামজোং মায়কৈদা হৌজিক হাংদোক্লিবা তোঙান তোঙানবা সেল্টর হোমশিংদা রিফ্যুজিশিং অসিগী মশীং নোংমা নোংমগী হেঙ্গৎলকপদগী মফমশিং অদুদা মখোয়না কন্ট্রোল তৌদুনা খুন্দাশিন্দুনা লৈননবা হোৎনরকপগী থৌওং চত্থদুনা মী কিহনবা, হাৎপা য়াওনা কিদনেপ্পিংগী থৌওং কয়ামরুম চত্থরকপনি হায়না এম এল এ লৈসিও কৈশীংনা চিফ মিনিষ্টর দা থাঙ্গৎখিবা চেরোল অদুদা পল্লি।
হৌজিক লোকেল কষ্টমরি লো অমসুং লৈঙাক্কি লো না মখোয়বু লাকশীনবা ঙমদবগী থাক্তা লৈরে অদুগা রিফ্যুজিশিং অসিগী খুদোংচাবা অমনা, মখোয় অসী ফোরেন কষ্টমরি প্রেক্তিসকি মখাদা লৈখিবা মরম্না মখোয়গী মথক্তা ৱায়েল চত্থদুনা চৈরাক পীননবা হোৎনবদসু খুদোংচাদবা কয়া মায়োক্নরগা লৈরি হায়রি। হীংশা কয়ামরুম চত্থরবা মতুংদা ম্যান্মার মায়কৈরোমদা অমুক চেনশীনখিবদগী থিবা খঙখিদবগী থৌওং কয়ামরুম মায়োক্নরগা লৈরি।মসীগুম্বা ময়াম অসি কোকহন্নবা লৈঙাক্কি মায়কৈদগী চূনবা থৌশিল অমা পায়খৎপীয়ু, ম্যান্মারদগী লোন্না অমসুং ফোংনা চঙশীল্লক্তুনা রিফ্যুজি সেল্টরশিংদা লৈশিনখ্রিবা মীওইশিং অসিনা হৌজিক্তি কামজোং অমসুং অকোয়বদা লৈবা খুঞ্জাশিংগী মশীংদগী য়াম্না হেঙ্গৎখ্রে হায়রি
