ইন্দিয়া অমসুং ম্যান্মার অনী তাইনরিবা ইন্টর্নেস্নেল বোর্দর অসিগী মিজোরাম গা তাইনরিবা কিলোমিটর ৫১০ গী ষ্ট্রেস অসীসু নীঙথীনা শম্বল খাজিন্দনা ইহো হোদুনা লৈরিবা মরম্না দ্রগ অমদি খূৎশু-খূৎলায়শিং আইন কায়না কারবার তৌবা মীওইশিংগীদি য়াম্না নুঙাইরবা হেভন অমা ওইদুনা ঙসীফাওবা লৈরক্লি।
মতম কয়াগী মমাঙদগী দ্রগ ট্রাফিক্করশিং অমদি খূৎলায় কারবার তৌবা মীওইশিংনা ম্যান্মারদগী মিজোরামগা তাইনরিবা ঙমখৈগী শরূক অসীদা ফাওদোক-ফাওজীন তৌদুনা য়াম্লবা দ্রগ অমদি খূৎশু-খূৎলায়শিং পুশিল্লক্তুনা লালহৌবশিংদা খূৎলায় সপ্লাই তৌবগী মথক্তা দ্রগকি পোৎলমশিং থাজীল্লকপা লেপ্তনা চত্থরক্লি। থৌওং অসীগী শরূক অমা ওইনা ঙরাং মিজোরাম দা সেক্যুরিটিগী কম্বাইন টিম অমনা ওপরেসন চত্থবদা অরোনবা কৈথেলদা লূপা লাখ অনী হেনবগী মমল ওইগদবা হেরোইন পাউদর অমসুং লূপা লাখ ৯৭.৮৫ লোমগী ভেল্যু ওইগদবা ক্বা সুপারিশিং মীওই অহুমদগী ফাগৎপা ঙম্লে হায়রি।
ফাগৎলবা মীওই অহুম অদুদি আইজোলদগী নংখাউখূপা(৩০) অমসুং রোঅটফেলা (৩৬) অমদি ম্যান্মার দগী এল টি সিয়ামা (৩৯) হায়রিবা মীওই অহুম অসীনি। মখোয় অহুম্মক চম্ফাইদা লৈবা এক্স সাইজ এন্দ নার্কোটিক্স দিপার্ট মেন্ট দা শিন্নখ্রে হায়রি।
