January 12, 2025
republic-of-the-union-of-myanmar

অকনবা হীংশা য়াওবা লান অমা থোক্লিবা ম্যানমারদা রেজিষ্টৈন্স ফোর্সকি খুত্তা জুন্টা লান্মিশিং হৌজিকসু মখা তানা চাউনা মায়থীবা নংলি। খ্বাইদগী অকোনবা থৌদোক ওইনা রেজিষ্টৈন্স ফোর্সনা ম্যাৱাদি টাউন জুন্টাগী খুত্তাগী মুন্দুনা লৌশীনবা ঙমখ্রে।  হায়রিবা টাউন অসী থাইলেন্দগা কংফাল লম্বীদা লল্লোন- ঈতীক তৌনরিবা খ্বাইদগী মরূ ওইবা মফম অমসু ওইরিবনি। রেজিষ্টৈন্স ফোর্সনা মসিগী মমাঙদসু চাইনা, ইন্দিয়া অমসুং বংলাদেশকা তাইনরিবা মখোয়গী মরু ওইবা সহর কয়ামরুম খূদূম চন্দুনা কন্ট্রোল তৌখ্রবনি। কারেন নেস্নেল য়ুনিয়ন (কে এন য়ু) অমসুং পিপলস দিফেন্স ফোর্সেস (পি দি এফ) না হৌখিবা চয়োলশিংদা জুন্টাগী মথক্তা অকনবা এত্তেক কয়া চত্থখ্রবা মতূংদা রেজিষ্টৈন্স ফোর্সনসু অকনবা ওফেন্সিভ চত্থরক্তুনা জুন্টাগী মিলিটরি বেজ কয়ামরুম লৌশিনখিবগা লোয়ননা হৌখিবা নোংমাইজিং নুমিত্তা ম্যাৱাদিদা লৈবা জুন্টাগী কম্মান্দ সেন্টরসু লৌশীনবা ঙমখ্রে হায়রি।

ম্যানমার অমসুং থাইলেন্দ অনীগী মরক্তা কংফাল লম্বীদা লল্লোন- ঈতিক তৌনবদা ম্যাৱাদি অসি য়াম্না মরুওইবা মফম অমা ওইদুনা লাকখিবনি। ম্যাৱাদি লৌশীনবা ঙমখিবা অসীনা রেজিষ্টৈন্স ফোর্সকি ওইনদি য়াম্না চাউনা মায় পাকপনি অদুগা জুন্টাগী মায়কৈদনা খ্বাইদগী শাথীনা মায়থীবগী ফীভম অমনি হায়রি।হৌখিবা চয়োল ফাওবদা জুন্টা লান্মিশিংগী মরক্তগী ট্রূপ  ৪৭৭ অমসুং মখোয়গী ঈমূং মনূংগী মীওই কয়াগা লোয়ননা রেজিষ্টৈন্স ফোর্সতা সরেন্দর তৌখ্রবনি অদুগা জুন্টাগী মায়কৈদা লৈরম্বা মীওই ৬০০ হেন্না ফোর্স অসীদা চঙজখ্রবনি।

মসিগী মনুংদা মিলিটরি ওফিসার ৬৭ য়াওরি হায়রি অদুগা ট্রূপশিং অদুনা মশিং য়াম্লবা খূৎশূ-খূৎলায়শিংশু সরেন্দর তৌখ্রবনি। মখোয়গী মনুংদা মেচিন গনশিং, মোর্টারশিং অমসুং এসোল্ট রাইফল চা কয়াসু লোয়নরকখি হায়রি। মমাঙদা রেজিষ্টৈন্স ফোর্সকি থ্রী ব্রদর্স এল্লায়েন্স হায়বদি আরাকান আর্মি, ম্যানমার নেস্নেল দেমোক্রেতিক এল্লায়েন্স আর্মি অমসুং টাং নেস্নেল লিবরেসন আর্মিগী অপূনবা ফোর্সনা ইন্দিয়াগা তাইননা লৈরিবা সগাইং রিজন্দা ওফেন্সিভ চত্থরক্তুনা খূদূম চনখ্রবা মতূংদা চাইনাগা তাইননা লৈরিবা সান ষ্টেট অমসুং বংলাদেশকা তাইননা লৈরিবা রখাইন ষ্টেট লৌশীনবা ঙমখ্রবনি।

Leave a Reply

Discover more from News Manipur

Subscribe now to keep reading and get access to the full archive.

Continue reading