মনিপুরদা অরীবা মতমদগী চহী খূদীংগী মেরাগী নোংমা পানবদা পাঙথোক্তুনা লাক্লিবা মেরা চাউরেন হৌবা থৌরম ঙরাং লায়নীংথৌ সনামহী টেম্পল বোর্দ, উকল অমসুং সনা কোনুং উত্রা শঙলেন্না খূৎশম্নরগা সনা কোনুংদা পাঙথোকখ্রে। রাজ্য সভাগী এম পিসু ওইরিবা নিংথৌ লৈসেম্বা সনাজাউবসু থৌরমদুদা শরুক য়াখি। মীয়াম্না ঈপা লায়নিংথৌ সনামহীগী মফমদা লমদম অসীবু ঈংনা- চীক্না, চাহোঙ-ঙাহোঙনা লৈহনবিনবা, কাঙলূপশিংগী মরক্তা নুংশিনবা পুরক্নবা থৌজাল পীবিয়ু হায়না থৌনিজখি।
অয়ূক পূং নিপান তাবদগী সনা-লূপা কোনয়াই চন্দুনা হৌদোকখিবা থৌরম অদূগী মতূংদা মীয়াম্না অচৌবা খোঙচৎ অমা চত্তুনা থৌরম অদূ মপূং ফাননবা হোৎনমিন্নখি। মেরা চাউরেন হৌবা থৌরম পাঙথোকপগী মরূওইবা মরমদি য়েলহৌঙৈদগী লমদম অসীদা লৈমিন্নরক্লিবা কাঙলূপ-ফূরূপশিংগী মরক্তা অমত্তা ওইবগী অমসুং নুংশি-চান্নবগী শক্তম অসী হেন্না চেৎশীলহন্নবনি।
থৌরম অসীনা লাকপদা অপূনবা, ঈঙ-তপ্পা অমসুং চাওখৎপা ঈরমদম মনিপুর অমা ওইরসনু, লমদম অসীগী মীয়ামগী পুন্সিদা নুঙাই-য়াইফবা মতম পূম্নমক্তা লৈরসনু হায়না থৌরমগী য়াইফা পাউজেল পীখিবদা মনিপুরগী গভর্নর লক্সমন প্রসাদ অচারিয়া অমসুং চিফ মিনিষ্টর নোংথোম্বম বিরেন্না ফোঙদোকখিবনি।
