হন্দক ন্যু দিল্লীদা পাঙথোকখিবা গ্লোবেল এ আই সম্মিৎ তা চাইনানা শাবা এ আই রোবোট অমা ইন্দিয়াগী রোবোট ওইনা মীয়ামদা উত্তুনা দিসপ্লে তৌখিবা অদূগী মায়োক্তা খোঙজঙ চঙশীনখিবা ইন্দিয়ান য়ূথ কংগ্ৰেসকি প্রসিদেন্ট অমসুং অতৈ লুচিংবশিং পুলিসনা ফাজীনখিবদু কন্দিসন অমত্তা য়াওদনা খূদক্তা থাদোক্কদবনি হায়বা খোল্লাউশিংগা লোয়ননা হৌখিবা থাংজা নুমিত্তা মনিপুর প্রদেশ য়ূথ কংগ্ৰেস কম্মিটি (এম পি ৱাই সি সি) না অকনবা মওংদা প্রোটেষ্ট তৌখ্রে।
ইম্ফালগী বির টিকেন্দ্রজিৎ রোদতা লৈরিবা কংগ্ৰেস ভবন্দা এম পি ৱাই সি সিনা চত্থখিবা প্রোটেষ্ট অদূ হেন্না পাকথোক চাউথোরক্তনবা মনিপুর পুলিসনা য়াম্না কন্না ঙাক-শেন্দুনা থমখি।এম পি ৱাই সি সি গী প্রসিদেন্ট আনন্দ ৱাহেংবম্না খোঙজঙ অদূগা মরী লৈননা ফোঙদোরকপদা, হন্দক পাঙথোকখিবা গ্লোবেল এ আই সম্মিট অদুদা চাইনানা পুথোকপা এ আই রোবোট অমা দিসপ্লে তৌখিবা থৌওং অদুনা লৈবাক অসীগী নেস্নেল ইন্টরেষ্ট তা ইজ্জৎ শোকহল্লি হায়দুনা ইন্দিয়ান য়ূথ কংগ্ৰেসনা অকনবা প্রোটেষ্ট তৌখিবনি।ইন্দিয়ান য়ূথ কংগ্ৰেস কি প্রসিদেন্ট উদয় ভানু চিব অমসুং অতৈ লুচিংবা কয়াবু ফাজীনখিবা অদূ য়াম্না চুমদবা অমনি, কন্দিসন অমত্তা য়াওদনা খূদক্তা থাদোক্কদবনি হায়বা খোল্লাউশিংগা লোয়ননা খোঙজঙ চঙশীনবনি হায়খি।
কংগ্ৰেস পার্টিনা লৈবাক অসীগী ইজ্জৎ কন্ননবা চঙশীল্লিবা খোঙজঙ অসীবু করিসু খন্থবা তৌদনা ভার্টিয়া জনটা য়ুভ মোরচা অমদি বি জে পি মাহিলা মোর্চা না কংগ্ৰেস পার্টিদা টার্গেট তৌদুনা খোল্লাউ কয়া লাউরক্লিবসি লাইবক থীবনি হায়নসু আনন্দ ৱাহেংবম্না ফোঙদোকখি।
