হন্দক পাঙথোকখিবা ১৮ শুবা লোক সভাগী মীখল অদুদা কংগ্রেস পার্টিগী টিকেত্তা আউটর মনিপুর লোক সভাগী সিট্টা মহাক্কি খ্বায়দগী নক্নবা লম্বাদগী ভোৎ মশীং লীশীং ৮৫ রোম হেন্দুনা মায় পাকখ্রবা আলফ্রেড কাঙম অথর য়াওনা মীখল অদুদা অহুমশুবা তাখিবা ইন্দিপেন্দেন্ট মীরেপ এস খো জোন অমসুং মরিশুবা তাখিবা অতোপ্পা ইন্দিপেন্দেন্ট মীরেপ এল্লিসন আবোনমাই হায়রিবা মীওই অহুম অসিনা লাক্কদৌরিবা চহী তরেৎফাওবগী মতমসিদা মীয়ামগী ফঙ্কসন অমত্তদা য়াওদুনা শরুক য়াবা অমসুং ৱা ঙাঙবনচিংবা তৌবা য়ারোই হায়না য়ুনাইটেদ নাগা কাউন্সিল (য়ু এন সি) না অকনবা মওংদা অথিংবা থমখ্রে।
হন্দক্কি লোক সভাগী মীখল অদুদা য়ু এন সি অমসুং রুলিং বি জে পিনা শৌগৎপা নাগা পিপলস ফ্রন্টকি মীরেপ ওইখিবা কাচুই টিমোথি জিমিক্না অনীশুবা তাদুনা মায়থীহৌখিবনি। অথর অমসুং জিমিকনা তাঙ্খুল কম্যুনিটিগী মীওইশিংনি অদুগা এস খো জোন্না পৌমাই কাঙলূপ্তগীনি অমসুং এল্লিসন আবোনমাই হায়রিবা মীওই অসীনা লিয়াংমৈ জাটিনি।
চহী অসীগী মে ২৯ দা মনিপুরগী চামদিলদা মীয়ামগী মীফমনা তাখিবা রিজোল্যুসনগী মতূংইন্না হৌখিবা জূন ১৩ দা য়ু এন সিগী ইমর্জেন্সি এসেমব্লিনা ৱারেপ অসী লৌরদুনা মখোয় অহুম চহী তরেৎ মীয়ামগী ফঙ্কসন অমত্তদা য়াওদুনা শরুক য়াবা অমসুং ৱা ঙাঙবা য়ারোই হায়না অকনবা মওংদা অথিংবা থমখিবনি।নাগাশিংগী ৱারেপকি মায়োক্তা মখোয় অহুম্না থবক তৌই হায়না মরাল শীবগা লোয়ননা নাগা য়ুনিটশিং অমসুং কাঙলূপ অসীগী মীয়াম্না ৱাফম অসীগী মায়োক্তা থবক তৌদনবসু খঙহনখি।
