মোইরাংপুরেল, ইথমদা কুকি মিলিটেন্টশিংনা অকনবা মওংদা নোংমৈ কাপশীল্লকখ্রে

ঙরাং অয়ূক পূং ১১ রোম তারকপদা ইম্ফাল ইষ্ট দিষ্ট্রিক্ট কি মোইরাংপুরেল, ইথমদা কুকি মিলিটেন্ট শিংনা অকনবা মওংদা অফবা মখলগী নোংমৈ শীজিন্নদুনা খুঞ্জাশিংদা কাপশীল্লকখ্রে। মোইরাংপুরেল ইথমগী শাকোক লৌকোল হায়না খঙনরিবা লৌকোলদা মৈতৈ ফূরূপকি খুঞ্জাশিংনা লৌ খোইবা অমসুং লৌরীয়া য়ান্দুনা লৈরিঙৈদা অফবা মখলগী নোংমৈ শীজিন্নদুনা কুকি মিলিটেন্ট শিংনা অকনবা মওংদা নোংমৈ কাপথরকখিবনি।
ইথমগী মমাঙথংবা শরূক্তা লৈবা, হান্না কুকিশিংনা লৈরম্বা বোংয়াং অমসুং কামু হায়রিবা চীঙগী মফমশিং অদু অমুক হন্না লৌশীন্দুনা খূদূম চন্ননবা হোৎনরক্তুনা মফমশিং অসিদগী ইথম অমসুং মোইরাংপুরেল এরিয়াশিংদা নোংমৈ কাপশীল্লকখিবা ওইগনি হায়রি। ইথম মোইরাংপুরেল গী তুরেল ৱাংমদা লৈবা কারোং, মোনধৌ, সৈতাংনচিংবা, হান্না কুকিশিংনা লৈরম্বা মফমশিং অসী হন্দক থোকখিবা হীংশাগী ঈরাং অসিদা ময়ূমশিং মৈ থাদোক্তুনা তান্থোকখিবদগী খুন্তাক লান্সিবগী ফীভমদা লৈখ্রবনি। মফমশিং অদু অমুক হন্না লৌশীন্দুনা খূদূম চন্ননবা হোৎনরক্তুনা নোংমৈ কাপশীল্লকখিবা ওইগনি হায়বগি থাজবা লৈরি।
মোইরাংপুরেল, ইথমগী খুল ঙাকপশিংনসু খূৎ হন্দুনা লাইসেন্স গনশিং শীজিন্নদুনা নোংমৈ কাপখি। থংনবা খুলশিংদগী ভীল্লেজ ভল্লন্টিয়রশিংনসু লান অদুদা মোইরাংপুরেল ইথমগী খুঞ্জাশিংগী মতেং পাংবা লাকখি অদুবু মখোয়না পায়রকখিবা লাইসেন্স গনশিং অদু মফম অদুদা লৈবা গোরখা রাইফলস অমসুং বিহার রেজিমেন্ট কি কাঙবূনা লৌশীনখিবদগী মৈরা পায়বীশিংনা অকনবা ঈহৌ চত্থরকখি। মদুগী মতূংদা জি আর অমসুং বিহার রেজিমেন্ট না লৌশীনখিবা খূৎলায়শিং অদু পীথোরকখি। হৌজিকসু মফম অসীদা টেন্সন য়াম্না ৱাংনা লৈনরি।