চৎলিবা মে থা অসীগী মঙাদা মনিপুরগী মফম কয়াদা শীৎখিবা অকনবা নোংলৈ- নুংশিৎকা লোয়নবা লেন্না ফূদৎখিবদগী খুঞ্জাশিংগী ইংখোল অমসুং লৌফম কয়াদা পাক- শন্না হৌবা মহয়-মরোঙ পাক- সন্না মাঙহনখিবশিং অদুগী মতাংদা সরভে চত্থবা হৌরে, অথুবা মতমদা পীবা য়াবা কম্পেন্সেসনগী মতেং পীরগনি হায়না চিফ মিনিষ্টর নোংথোম্বম বিরেন্না ফোঙদোকখ্রে।
লেন অমসুং অকনবা নোংলৈ- নুংশিৎনা মাঙহন- তাকহনখিবা তোঙান তোঙানবা মফমশিংদা মখা তানা চিফ মিনিষ্টরনা চত্তুনা য়েংশিনখিবগা লোয়ননা মহাক্না ৱাফম অসি ফোঙদোকখিবনি। থা অসীগী তরেত্তা মহাক্না ইম্ফাল নোংচুপ পানাগী মফমশিংদা কোয়না চত্তুনা অমাঙ- অতা থোকখ্রবা লৌফম কয়াদা য়েংশিনখিবগা লোয়ননা থা অসীগী নিপান্দা মখা তানা ইম্ফাল ইষ্ট দিষ্ট্রিক্টকি মফমশিংদা কোয়না চত্তুনা য়েংশিনখিবনি।
ইম্ফাল ইষ্ট দিষ্ট্রিক্টকি মনুংদা লৈবা কৈরাউ এ সি গী তোঙান তোঙানবা মফমশিংদা থা অসীগী নিপান্দা চিফ মিনিষ্টরনা অয়ূক পূং তরামাথোই তাবদা কোয়না চত্তুনা য়েংশিনখিবগা লোয়ননা খেত্রিগাউ কেন্দ্রগী এরিয়াশিংদশু চত্তুনা য়েংশিনখিবনি। চিফ মিনিষ্টরগী খোঙচৎ অদুদা কৈরাউ এ সি গী এম এল এ লৌরেম্বম রামেশ্বর অমসুং খেত্রিগাউ কেন্দ্রগী হান্নগী এম এল এ নহাকপম ইন্দ্র জিৎসু শরুক য়াখি।খোঙচৎ অদুদা ইম্ফাল ইষ্ট দিষ্ট্রিক্টকি দি সি অমসুং মহাক্কী ষ্টাফশিংশু শরুক য়াখি।
