রসিয়া, অষ্ট্রিয়াগী নুমিৎ হুম্নিগী খোঙচৎকিদমক পি এম মোদী মোস্কোদা থুংখ্রে

ইন্দিয়া-রসিয়া লৈবাক অনীগী ২২ শুবা এন্যুয়েল সম্মিট শরুক য়ানবগীদমক অদুগা অষ্ট্রিয়াদসু য়ৌশিন্দুনা হেন্না মরী চেৎশীলহন্ননবা নুমিৎ হুম্নিগী খোঙচত্তা প্রাইম মিনিষ্টর নরেন্দ্র মোদী ঙরাং মোস্কোদা থুংখিবগা লোয়ননা রসিয়ান প্রসিদেন্ট ব্লাদিমির পুটিনগা উনখ্রে।
পি এম মোদিনা মোস্কো এয়রপোর্ট তা থুংখিবদা রসিয়াগী অহানবা দিপ্যুটি প্রাইম মিনিষ্টর দেনিস মন্তূরোভনা তরাম্না ওক্লদুনা মখোয় অনি কার অমত্তদা পূন্না তোংমিন্নদুনা পি এম মোদিনা লৈগদৌরিবা হোটেল অদু তম্না লাকখি। নরেন্দ্র মোদি গী খোঙচৎ অসিনা লৈবাক অহুম অসিগী মরক্তা মহৌশাদগী লৈনরক্লিবা মরী হেন্না চেৎশীলহল্লগনি অদুগা ট্রেদ, দিফেন্স, ইনর্জিগী অমদি অতৈ হীরম কয়াদা পাকথোক চাউথোক্না মতেং পাংনদুনা থবক পায়খৎমিন্ননবা খন্ন-নৈনগনি লোয়ননা য়ান্ন-চেরোলশিংসু খূৎয়েক পীনগনি হায়রি।
ইন্দিয়া অমসুং রসিয়া লৈবাক অনীনা চহী খূদিংগী এন্যুয়েল সম্মিট পাঙথোক্তুনা মহৌশাদগী লৈনরক্লিবা নুংশিনবগী অমসুং হীরম কয়াদা মতেং পাংনবগী থৌওংশিং মখাতানা কায়হন্দনা থম্ননবা হোৎনদুনা লাকমিন্নরি। কুমশিং ২০২১ গী দিসেম্বর ৬ তা ন্যু দিল্লিদা পাঙথোকখিবা এন্যুয়েল সম্মিট অদুদনা ভ্লাদিমির পুতিন লাক্তুনা শরুক য়াখিবনি।