মীয়ামগী লাইফলাইন ওইরিবা নেস্নেল হায়ৱেদা মীওই খরা পূন্সীন্দুনা ব্লোকেদ চত্থবগী থৌওংশিংদা সেক্যুরিটি ফোর্স না এক্সন লৌখৎপা ঙমদ্রিবসি লাইবক থীবনি: এম এম দব্লিয়ু ও

মনিপুরদা লৈমিন্নরক্লিবা য়েলহৌমী অমসুং য়েলহৌমী নত্তবা মীওই খরনা পেন্দবা খরা লৈরকপদা মনিপুর মীয়ামগী লাইফলাইন ওইরিবা নেস্নেল হায়ৱেশিংদা ঙাইহাক লৈতনা ব্লোকেদ, জেনরেল ষ্ট্রাইক, বন্দ চত্থদুনা মীয়ামগী তঙায়ফদনা চঙবা পোৎলমশিং পুশিল্লকপা য়াহন্দবদগী লমদম অসীদা পোৎ-চৈগী মমল কা হেন্না ৱাংখৎলক্তুনা সধারন মীয়ামদা শাথিবা মখলগী অৱাবা খুদোংচাদবা কয়া মায়োক্নদুনা লৈরি।

মরী লৈনবা খূদীংমক্না মরম চাবা নত্রগা চাদবা দিমান্দ শিং লৈঙাক্তা তানবা মতমদা কন্সটিট্যুস্নেল ওইবা মওংদা চঙশীনবিয়ু, মদুদা য়ারকপা নত্রগা লৈঙাক্না য়ারক্তবা হায়বদুনা অতোপ্পা ৱাফম অমা ওইরগা, মীয়ামগী পূকচাক ওইরিবা লম্বী অনী অসিদা করিগুম্বা মখল অমত্তদা অপনবা পীবীগনু হায়না মনিপুর মীটৈ পাঙল ৱেলফ্যের ওরগনাইজেসন ( এম এম দব্লিয়ু ও) না ফোঙদোকখ্রে।

ঙরাং ইম্ফালগী মিনুথোং হট্টাদা লৈবা লূপ অসীগী ময়ায় লোয়শঙগী শঙলেন্দা পাঙথোকপা পাউমীশিংগা উনখিবা থৌরম অমদা এম এম দব্লিয়ু ও গী প্রসিদেন্ট বোবোই কোরিময়ূম্না  ৱাফম অসী ফোঙদোরকখিবনি। অসীগুম্ব লমহেন তুহেনবশিং অসী ষ্টেট অমসুং সেন্ট্রেল ফোর্স শিংনা ঙসীফাওবদা করিগুম্বা অথীংবা অমত্তা পীবা ঙমদ্রি হায়নসু মহাক্না পেন্দবা ফোঙদোকখি।