মীয়ামগী পুন্সি অমসুং লন-থুম কনবা ঙমদ্রগা মমাঙগী লৈঙাক্তা অসুম তাইনরিবসি করি হায়রিবনো :ইবোবি

মণিপুরদা হৌজিক লৈঙাক্লিবা বি জে পিনা লুচিংবা গভর্নমেন্ট অসিনা মীয়ামগি পুন্সি অমসুং লন-থুম ঙাকপা ঙমদ্রগা থায়নগী মমাঙদা লৈরম্বা লৈঙাক্কি মরালনি হায়দুনা ঙাইহাক লৈতনা অসুম ঙাঙ -শক্লিবসি খ্বাইদগী ঈকায়নিঙায়নি, থাবল চোংবা হৈত্রগা শুমাঙদা তাইনবদুনি, লৈঙাক সাসন কম্মাইনা চল্লাইগনি খঙদ্রবদি ফমদগী কুমথবদা কনানা করি হায়রক্কদবা লৈবগে হায়না হান্নগী মনিপুরগী চিফ মিনিষ্টর অমসুং সি এল পি লিদর ওক্রম ইবোবিনা অকনবা ৱাফম ফোঙদোকখিবগা লোয়ননা হৌজিক লৈঙাক পায়রিবা দিস্পেন্সেসন অসিদা পারা অমা তম্বিবগী্ ৱাফম ফোঙদোকখ্রে।
মমাঙদা ওইনাম কেন্দ্রদা রিপব্লিকান পার্টি ওফ ইন্দিয়া (আর পি আই) অথৱালেগী মীরেপ অমা ওইনা লেপখিবা লাইতোঞ্জম ব্রোজেন এদভোকেট অমসুং মহাক্কী মীওইশিং, বিষ্ণুপুরদগী কে ঐচ শ্যাম অমসুং মহাক্কী ৱার্করশিং কংগ্রেস পার্টিদা নৌনা য়াওরকপদা হরাও- তরাম্না ওকপগী থৌরম অমা পাঙথোকপদা হান্নগী চিফ মিনিষ্টর ইবোবিনা ৱাফম অসি ফোঙদোকখিবনি।
১৮ শুবা লোক সভাগী মীখল অসুম অসুম নকশীল্লকপগা লোয়ননা কংগ্রেস পার্টি অমসুং ইন্দিয়া ব্লোককি কমন কেন্দিদেট ওইনা থাগৎলিবা মীরেপ অনীবু শৌগৎপিরক্তুনা হেন্না মপাঙ্গল কনখৎহন্ননবা কংগ্রেস পার্টিদা চংলকপা অসী খ্বাইদগী হরাও- নুঙাইবা ফাওই। সেন্টর অমসুং ষ্টেট গভর্নমেন্ট লৈঙাকশিংনা মনিপুরবু ইন্দিয়াগী শরুক অমা নত্তবগী মীৎয়েং য়েংদুনা ঙসীফাওবা লাক্লি।ষ্টেট অসিদা বি জে পি লৈঙাক লৈরকপা চহী তরেৎ শুরে অদুগা সেন্টরদনা চহী তরা শুরবনি। অদুবু ঙসীফাওবা ষ্টেট অসিদা লৈঙাক অসীনা করম্বা মশক নাইবা মীয়ামদা কান্নবা পীগদবা প্রোজেক্ট অমত্তা পায়খৎখ্রবগে হায়খি।
কংগ্রেস পার্টিনা মমাঙদা পায়খৎলম্বা প্রোজেক্ট কয়া অদু মশিং কয়ামুক য়াম্বগে, মীয়ামগি য়াইফা-থৌরাংশিং কংগ্রেসনা কয়ামুক পায়খৎলম্লবগে হায়না ঙাইহাক লৈতনা হংদুনা লৈরি অদুবু কংগ্রেসনা পায়খৎলম্বা প্রোজেক্টশিং অদু শঙ্গাবগী থৌরম পাঙথোকপসে হৌজিক লৈরিবা বি জে পি লৈঙাক্না চহী তরেৎ অসিদা লোইবা ঙমদ্রি হায়না ইবোবিনা ফোঙদোকখি।
কংগ্রেস পার্টিনা মমাঙদা শাবা লোইশিন্দনা লৈহৌবা, শাবদি লোইরগা শঙ্গাবদি নংহৌদ্রবা স্কুল বিল্ডিংশিং, ওফিসশিং, ইষ্টাব্লিসমেন্ট কয়ামরূম অদু ঙসী লৈঙাকলিবা বি জে পিগী লৈঙাক অসীনা চহী তরেৎ চুপ্না কোয়চেন চেন্দুনা শঙ্গানবা হোৎনবদা লোইবা ঙমদবদগী হুমাং অনপ্পি কাংদুনা লৈরি হায়না ইবোবিনা ফোঙদোকখি।বি জে পিনা পঙহায় হায়জিল্লগা মনিপুরগী প্রজা মীয়ামদগী ভোৎ খোমগনী খল্লিবদু ওইথোকলরোই হন্দক্কিদি, মনিপুরগী মীয়াম ঙসিদি পঙদ্রবনি হায়বসে বি জে পিনা খঙজীনগদবনি হায়খি।
চিফ মিনিষ্টর বিরেন্না মমাঙগী লৈঙাক পন্দুনা হেক হেক চৈশিন্নরক্লিবসি খন্থবা ৱাৎপদগীনি, মমাঙগী লৈঙাক অদুদা মহাক য়াওরম্বা নত্তব্রা হায়না ইবোবিনা হংখি।কংগ্রেস লৈঙাক মতমদা বোর্দর ফেন্সিং তৌরমদে হায়না শ্রি বিরেন্না মীয়ামদা নমথাক্কি চীরোল তৌরিবদু মনিপুরগী মীয়াম্না ময়েক শেংনা খঙবা পোৎনি।কংগ্রেস লৈঙাক মতমদা বোর্দর ফেন্সিং কিলোমিটর তরা হেন্না তৌরম্মি হায়বসি মীয়াম্নদি ময়েক শেংনা খঙবা ঙম্মি অদুবু শ্রি বিরেন্না খঙবা ঙমলমদবসি মহাক মতমদুদা কদায়দা লৈরুবগে হায়না হান্নগী চিফ মিনিষ্টর ইবোবিনা হংখি।