মীয়ামদা তোকঙা শন্দোক্তুনা চরাঙনবা হীংশা থোকহনবা থিংনবা হোৎনবদা মেদিয়াগী থৌদাং অসূক্কি মতীক চাউই: বিরেন

খুন্নাই অসীদা ফত্রবা মীওই কয়ানা সোসিয়েল মেদিয়াগী খূত্থাঙদা য়ূম্ফম য়াওদবা অরানবা ৱাফম কয়া শন্দোক্তুনা চরাঙনবা হীংশা থোকহনবা কয়া লৈরি। মখোয়না মীয়াম্বু লান্না লমজিংদূনা কম্যুনিটিশিংগী মরক্তা নুংশিনদনবা, খাইবুং-খাইবুং তানহন্ননবা ঙাইহাক লৈতনা হোৎনরি। ফত্তবদা হৈনরবা, রাজনিটিগী অপীকপা পূকচেলদা থবক তৌদুনা খুন্নাই অসীগী মীয়ামগী পূক্নিং ৱাখলশিং অরানবা মায়কৈরোমদা পুথোক্তুনা কম্যুনেল ক্লাশ থোকহল্লগা কূম্মৈ ওইনা য়েংদুনা নুঙাইথোকপা ঙম্বা মী কয়া লৈরি।

মখোয়না ফোঙদোক্লিবশিং অদূ য়াম্না হৈ- শিংনা চত্থরকপা মরম্না চুমদা-চুম্লবা মানবদগী মীয়াম্নসু মদুদা য়াম্না থাজগল্লি। মসীগুম্বা খুন্নাই অসীগী মহীকশিং অসী মশক খঙদোক্তু না অকনবা দন্দি পীননবা হোৎনবা অমসুং মীয়ামদা অশেংবা, অচূম্বা অদূ করিনো, অরানবনা করম্বনো হায়বদূ খঙহন্ননবা হোৎনবদা মেদিয়ানা পূম্নমক্তগী থৌদাং চাউবা য়াম্না হেল্লি হায়না চিফ মিনিষ্টর নোংথোম্বম বিরেন্না ফোঙদোকখ্রে। ওল মনিপুর ৱার্কিং জর্নেলিষ্ট য়ুনিয়ন ( অমজু) লিংখৎখিবগী চহী ৫০ শুবা গোল্ডন জুবিলি থৌরমদা অথোয়বা মীথূংলেন ওইনা শরুক য়ারদুনা চিফ মিনিষ্টরনা ৱাফম অসী ফোঙদোকখিবনি।

জর্নেলিষ্ট শিংগীদমক ষ্টেট লৈঙাক্কি মায়কৈদগী মখাতানা পাংবা য়াবা মতেং পাংনবগীদমক মতম চুপ্পদা থৌরাং তৌদুনা লৈরি হায়নসু চিফ মিনিষ্টরনা ফোঙদোকখি। থৌরম অদূগী মনূং চন্না ভেটরান জর্নেলিষ্টশিংদা মেমেন্টোশিং পীদুনা ঈকায় খুম্নবা ঊৎখি।মহাক্কি লৈঙাক্না লমদমসিদা চত্থরকপা ৱার ওন দ্রগ কেম্পেনগী মখাদা লূপা ক্রোর ৬০,০০০ হেনবগী দ্রগকি পোৎলমশিং ফাগৎপা ঙমখ্রে হায়না থৌরম অদুদা চিফ মিনিষ্টরনা ফোঙদোকখি।