মনিপুরদা হৌজিক থোক্লিবা হীংশাগী ঈরাং অসী লোইশিন্ননবা হোৎনবদা মীওই কয়া মখা তানা হাৎহনখিদৌরিবগে হায়না রুলিং পার্টিগী এম এল এসু ওইরিবা থাংমৈবন্দ কেন্দ্রগী খুমুকচম জয়কিষন্না ষ্টেট লৈঙাক্কি মীৎয়েং চিংশিনখ্রে। থা অসীগী অমদা চিন কুকি- নার্কো টেরোরিষ্ট শিংনা দ্রোন শীজিন্নদুনা কৌত্রুক, কদাংবন্দ এরিয়াশিংদা ঈখঙ- খঙহৌদনা বোমগী এত্তেক চত্থরকখিবদা বোম মচেৎনা পানবদগী শোক্তুনা হৌজিক হৌজিক লাঙ্গোলদা লৈবা শীজ হোস্পিটালদা লায়কন্নরগা লৈরিবা ইম্পেক টি ভিগী রিপোর্টর মুসুক কি ফীভম য়েংশিনখিবগা লোয়ননা শেলগী তেংবাংসু পীখিবা এম এল এ জয়কিষন না ৱাফম অসী ফোঙদোকখিবনি।
বি জে পিগী নেসন ফার্ষ্ট, পার্টি সেকেন্দ হায়বা নিটি অদূ থবক্তা ওন্থোকপা মতম য়ৌরে। মনিপুরগী হীংশাগী ঈরাং অসী নমথনবনি হায়দুনা সেন্তরনা সেক্যুরিটি ফোর্স লীশীং ৭০ রোম থাজিন্দুনা দিপ্লোই তৌরে হায়রবসু কুকি- মিলিসেন্ট শিংনা মনীংতম্না মী হাৎনীংবা মতমদা হাৎপদা অথিংবা পীবা ঙমদ্রিবসিগী মতাংদা রুলিংগী মিনিষ্টর অমসুং এম এল এ শিংনা অমত্তা ওইনা চেরোল ইদুনা নত্রগা হকথেংননা চত্তুনা প্রাইম মিনিষ্টরদা খঙহনবগী মতমদু য়ৌরবনি হায়বা ৱাফম মহাক্না ফোঙদোকখি।
দ্রোন শীজিন্নরগা বোমগী এত্তেক চত্থবা হায়বসি য়েক্নবা লৈবাক অমগা লান্থেংনবদা চত্থগদবা থৌওং অমনি। তাঞ্জা অসী য়ৌরবফাওবা ইন্দিয়া লৈঙাক্না তূমিন্না য়েংদুনা লৈশিল্লিবা থৌওং অসী খ্বাইদগী লাইবক থীবনি হায়না জয়কিষন না ফোঙদোক্লদুনা চিন-কুকি নার্কো- টেরোরিষ্ট শিং মপূংফানা তকথোক্ট্রিমখৈ লমদমশিদা শান্তি পুরকপা ঙমখিরোই হায়খি।
