মেঘচন্দ্রনা প্রাইম মিনিষ্টর মনিপুরদা অমুক্তংদি লাকপিরগা থোক্লিবা হীংশাগী ঈরাং অসী লোইশিনবিয়ু হায়না অইবা চেরোল পি এম ও দা হকথেঙননা চত্তুনা পীশীনখ্রে

চহী অমগা মখায় ফাজীল্লক্লবা মনিপুরদা হৌজিক থোক্লিবা হীংশাগী ঈরাং অসী সেন্টরনা থৌশাদনা লৈথোকখিবা অমসুং প্রাইম মিনিষ্টরনা ৱাফম অমত্তা ফোঙদোক্তনা ঙসীফাওবা খঙশীন্নদনা লৈথোকখিবা মতৌদা খম থেংনা পেন্দ্রবা মনিপুর প্রদেস কংগ্রেস কম্মিটি (এম পি সি সি) গী মায়কৈদগী পার্টিগী ষ্টেট প্রসিদেন্ট ওইনা লৈরিবা কৈশাম মেঘচন্দ্রনা ঙরাং প্রাইম মিনিষ্টর ওফিস (পি এম ও) তা হকথেংননা চত্তুনা, মনিপুরদা প্রাইম মিনিষ্টর অমূক্তংদি লাকপিয়ু, মনিপুর অসীসু ইন্দিয়াগী মনূং চল্লিবা ষ্টেট অমনি হায়বা অইবা চেরোল অমা পীশীনখ্রে।

মহাক্না পি এম ওদা চঙশীন্দুনা চেবাও পীশীনখিবা অদুদা এম পি সি সিগী স্পোক্সপার্সনসু ওইরিবা ওল ইন্দিয়া কংগ্রেস কম্মিটি (এ আই সি সি) গী মেম্বর ভূপেন্দা মৈতৈসু শরুক য়াখি। ঙরাং নুংদাং কংগ্রেস কি ফেসবুক পেজদা মসীগী মতাংদা ফোঙদোরকখিবনি। হৌখিবা কুমশিং ২০২৩গী মে অহুমদগী চিন- কুকি- মিলিসেন্ট শিংনা মনিপুরগী য়েলহৌমী মীটৈ কম্যুনিটিদা অতম্ননা হীংশাগী অকনবা এত্তেক চত্থরক্তুনা মীওই চহুমলোম হাৎখ্রে, য়ূম লীশিং তরারোম মৈনা তুম্না থাদোকখ্রে, মীওই লীশীং হুম্ফু হেন্না লাঞ্জেন্নহন্দুনা রিলিফ কেম্প শিংদা লৈরি।

সেপ্তেম্বর থা অসীগী অমদগী কুকি- মীলিটেন্টশিং অসীনা হায় টেক দ্রোণ বোম্বিং এত্তেক ফাওবা চত্থরক্তুনা অমসুং রোকেট প্রোপেল্ড বোম এত্তেক চত্থরক্তুনা অকনবা মওংদা লান্দারক্ল ফাওবদা সেন্টর লৈঙাক্না খঙশীন- উশিন্নদনা লৈথোকখিবদা খম থেংনা পেন্দবদগী প্রাইম মিনিষ্টর অসী মনিপুরদা অমুক্তং লাকপীনবা চেরোল অদু ফোর্মেল ওইনা পীশীনখিবনি হায়না মেঘচন্দ্র না ফোঙদোরক্লি।