চৎলিবা সেপ্তেম্বর থা অসীগী হৌখিবা তাং ১৮,য়ূমজকৈশা নুমিত্তা লমদমসিদা য়েলহৌঙৈদগী নুংশি-চাননা লৈমিন্নরক্লবা মীটৈ- পাঙল অমসুং মীটৈ কম্যুনিটি অনীগী মরক্তা নুংশিনদনবা শীংচেপ থাজিল্লকপা মানবা ওদিও অমা সোসিয়েল মেদিয়াদা ভাইরেল ওইরকখিবা অদূ খ্বাইদগী লাইবক থীবনি। অসীগুম্বা, পূন্না হিংমিন্নরগা অৱা-অনা কয়াগী থৌদোকশিংদা শরুক য়ামিন্নদুনা লাক্লবা, তৎন-থানবা য়াররোয়দবা ফূরূপ অনী অসীগী নুংশিনবগী মরীদা অকায়বা থোকহন্ননবা অতম্ননা থবক তৌরিবা, মচেৎ-মকায়গী ৱাখল্লোন্দা থবক তৌরিবা, মীফত্ত- মীথীঙ্গায়শিং অসী খুন্নাই অসীগী মহীক্নি। মখোয়বু মীয়াম অমসুং লৈঙাক অসীনা খূদক্তা থিগত্তুনা খ্বাইদগী অকনবা মওংদা চৈরাক পীদূনা অসীগুম্বা থৌওংশিং অসীগী চন্নফম লমদমসিদা লৈতে, ফূরূপ অনী অসীগী মরক্তা শীঙচেপ থাবা য়াদে হায়বদু খঙহনগদবনি হায়না ফেদরেসন ওফ সিভিল সোসাইটি ওরগনাইজেসন্স (ফোক্স) মনিপুরনা ফোঙদোকখ্রে।
ককৱাদা লৈবা ওরগনাইজেসন অসীগী ওফিসতা পাঙথোকখিবা পাউমীশিংগা উনখিবা থৌরম অমদা ফোক্সকি জেনরেল সেক্রেটরি অঙোম পুনিলকুমারনা ৱাফম অসী ফোঙদোক্লদুনা হায়, চহী চা কয়াগী মমাঙদগী লমদমসিদা অৱা-অনা, খুদোংথীবা কয়া পূন্না থেংনমিন্নদুনা ঈরমদম মনিপুরগীদমক পাম্বোম তিংমিন্নদুনা লাক্লবা মীটৈ অমসুং মীটৈ- পাঙল অনীগী নুংশিনবগী মরীদা অকায়বা থোকহন্ননবা অতম্ননা হোৎনরক্লিবসি তরাইনা লৌবা য়ারোই। চহী তরেৎ খুন্তাকপা, কুমশিং ১৮৯১ গী এংলো-মনিপুরি ৱারনচিংবদা ফূরূপ অনী অসীনা পূন্না পাম্বোম তিংমিন্নদুনা লাক্লিবনি হায়খি।
অসীগুম্বা অপূনবগী, নুংশিনবগী মরীদা অকায়বা থোকহন্ননবা শীল্লিবশিং অসীগী মথক্তা লৈঙাক অসীনা অথূবদা থিগত্তুনা মতূংদা খূদম-চাংদম ওইহৌবা য়াবা মখলগী অকনবা দন্দি পীয়ু হায়খি। থৌরম অদূদা মনিপুর মুসলিম ৱেলফ্যের ওরগনাইজেসন (এম এম দব্লিয়ু ও) গী প্রসিদেন্ট বোবোই কোরিময়ূমসু শরুক য়ারদুনা, হন্দক ফূরূপ অনীগী মরক্তা অকায়বা থোকহনবা য়াবা ওদিও অমা ভাইরেল ওইহনখিবা অদুদা চেন্নরিবা মীওই নত্রগা মীওইশিং অদূ মীটৈ- পাঙল ওইরবসু, মীটৈ ওইরবসু থিগত্তুনা অকনবা চৈরাক পীহৌবগী তঙায়ফদবা লৈ হায়না ফোঙদোকখি।
