চৎলিবা থা অসীগী ১৭ তা চত্থখিবা পার্লিয়ামেন্ত মীফমগী অথেঙবা নুংদাংগী মতমদা মনিপুরগী রাজ্য সভা এম পি লৈশেম্বা সনাজাউবনা ষ্টেট অসীগী ওইনা মালেমদা মমীং লৈরবা, তাঙলবা শগোল মখল অমা ওইনা লৈরিবা মনিপুরি পোনি কন্ননবা অকনবা পোলিসি অমা চৎনহনবিয়ু হায়না সেন্তর লৈঙাক্কি পূক্নীঙ চিংশিনখ্রে।
পার্লিয়ামেন্ত গী মীফম অদুদা এম পি সনাজাউবনা স্পেসিয়েল মেন্সন অমা ওইনা ৱাফম অদূ পুখৎখিবনি।মহাক্না ফোঙদোকখিবা মতূঙ ইন্না, মনিপুরগী শক্তম, পুৱারি, নাৎ অমসুং কলচরগী সিম্বোল অমা ওইরিবা মনিপুরি পোনি হায়না খঙনরিবা শগোল মখল অসী ইচম চম্বা শগোল অমা নত্তে। মনিপুর মীয়ামগী মায় ওইবতা নত্তনা শান্ন-খোৎনবা,শা-লান্দা থৌনা য়াম্না ফবা,লমজেল য়াম্না য়াঙবা শগোল মখল অমনি।চহী লীশীং মঙা হেনবা মনিপুরগী পুৱারিগা শাগোন্নদুনা লাক্লবা শা মখল অসী ঙসীদি মরম কয়াদগী মনিপুরদা লীশীং অমগী মখাদা লৈরক্লি।মসী য়াম্না লাইবক থীবা অমনি হায়খি।
চৈরকশিদা পোনি শগোল অসী হূরান্দুনা শদোঙ শেমদোক্লগা য়োনবা অমসুং চাবগী পাউসু লৈরে।মরম অদুনা মনিপুরি পোনি কন্দুনা থম্নবা অমদি মশীং হেনগৎহন্ননবা থৌশিল অমা চৎনহন্সি হায়না এম পি অসীনা লৈঙাক্কি মফমদা তকশীনখি।
