মেনলেন্দ ইন্দিয়াগী অতৈ ষ্টেটশিংগা শম্নরগা লৈরিবা, আসাম অমসুং নাগালেন্দনচিংবা ফাওদুনা চৎলিবা মনিপুরগী নেস্নেল হায়ৱে নম্বর- টু হায়বদি ইম্ফাল দিমাপুর রোদ অমসুং ইম্ফাল জিরিবাম রোদ হায়বদি নেস্নেল হায়ৱে নম্বর-৩৭ অনী অসীদা খুন্নাইগী অমাঙ- অতা থোকহল্লিবা ফত্রবা শকখঙদবা, খূৎলায় পায়বা মীওই কয়ানা ঙাইহাক লৈতনা মাল পুবা, পেসেঞ্জর গারিশিং অমসুং লন্নাই মীওই কয়াদগী পোৎ-চৈ মুনবা, মী হাৎপা, ফূবগী থৌওংশিং চত্থরগা লৈরিবা কয়া অসী থিংনবগীদমক সেন্টরনা হায়ৱেশিং অসিদা প্রোটেক্সন মতীকচানা থম্ননবা অকনবা থৌরাং থৌশিল পায়খৎপিয়ু হায়না রাজ্য সভাগী এম পি নিংথৌ লৈশেম্বা সনাজাউবনা রাজ্য সভাদা ফোঙদোক্তুনা সেন্টর লৈঙাক্তা য়াম্না কন্না তকশীনখ্রে।
হায়ৱেশিং অসীদা ঙাইহাক লৈতনা বন্দ-ব্লোকেদশিং চত্থরকপনা মনিপুরগী মীয়ামদা কা হেন্না অৱাবা কয়া মায়োক্নহল্লে। তঙায়ফদবা পোৎলমশিং পুশিল্লকপা অমসুং লল্লোন- ঈতীক তৌবদা অয়েৎ- অপন ঙাইহাক লৈতনা পীবা মরম্না মনিপুরদা পোৎ-চৈগী মমল কা হেন্না ৱাংবগী অমসুং চীঞ্জাক্কি পোৎলমশিং ফংদবগী প্রোব্লেম কয়া মায়োক্নহল্লে হায়না ফোঙদোকখি।
লম্বী অসীদা ঙাইহাক লৈতনা খূৎলায় পায়বা শকখঙদবা মীওইশিংনা পেসেঞ্জর অমদি লন্নাই গারিশিংদগী গন পোইন্টতা পোৎলমশিং মুনবগী থৌওং চত্থবনা লম কোয়বা মীওইশিং মনিপুরদা চঙলকপা কিনবদগী টুরিজম ইন্দষ্ট্রিদসু অচৌবা চৈথেং মায়োক্নহল্লে হায়না তকশীনখিবনি।
