চৎলিবা থা অসীগী তরাতরেত্তা য়ুনিয়ন হোম মিনিষ্টর আমিট সাহনা ন্যু দিল্লিদা কৌদুনা মনিপুরগী মতাংদা পাঙথোকখিবা সেক্যুরিটি মিট অদু লৈবাক অসীগী কন্সটিট্যুসনগী মায়োক্তনি অদুগা মনিপুর লৈঙাকপু ঈকায়বা পীবনি হায়না মনিপুর প্রদেশ কংগ্রেস কম্মিটি (এম পি সি সি) গী প্রসিদেন্ট কৈশাম মেঘচন্দ্রনা অকনবা মওংদা য়ানিংদবা ফোঙদোকখ্রে। ইন্দিয়ান কন্সটিট্যুসনগী তরেৎশুবা সেদ্যুল্ডগী মতূং ইন্না ষ্টেটকি লো এন্দ ওর্দর ঙাকপা হায়বসি মরী লৈনরিবা ষ্টেট অদুগী মথৌনি হায়না পল্লদুনা ষ্টেট লিষ্ট তা চন্দুনা লৈরিবনি।
মনিপুরগী লো এন্দ ওর্দরগী মতাংদা মীফম পাঙথোক্তুনা খন্নরকপা মতমদা ষ্টেট অসীগী চিফ মিনিষ্টর অমসুং অতৈ লেজিসলেটরশিং অমত্তা য়াওহনখিদবা হায়বসি কন্সটিট্যুসনবু খোঙ্গোয়নবা থৌওং অমনি হায়দবা য়ারোই। ষ্টেট অসীগী মীয়াম অমসুং লৈঙাক অসীবু ইফোং ফোংনা ইকায়বা পীবনি। মনিপুরগী হৌজিক বি জে পিগী চিফ মিনিষ্টর ওইরিবা নোংথোম্বম বিরেনবু করেম্নবগী ৱাফম্লা, মহাকপু সেন্টরগী বি জে পি লুচিংবশিংনা তশেংনা থাজবা লৈতবদগী চত্থরকপা নো-কনফিদেন্স মোসন অমরা হায়বা ৱাহং অমা মতাংসিদা চোংথোরকলি হায়খি।
মনিপুরগী দি জি পি অমসুং সেক্যুরিটি এদভাইজর অনীমক নন-মনিপুরি ঙাক্তনি। মখোয় অনীবু কৌরক্লগা চিফ মিনিষ্টর অমসুং অতৈ লেজিসলেটরশিং অমত্তা য়াওহনখিদবা হায়বসি কন্সটিট্যুসনবু খোঙ্গোয়নবা থৌওং অমনি হায়না মহাক্না ইম্ফালগী বির টিকেন্দ্র জিৎ রোদতা লৈবা কংগ্রেস ভাবন্দা পাউমীশিংদা ফোঙদোকখি।
