মনিপুরগী হীংশা অসী লোইশিন্ননবা রোদমেপ অমা য়াৎথোক্লে, অথূবদা লোইশিনবা ঙম্লগনি: অমিট শাহা

মনিপুরদা হৌজিক লৈরিবা হীংশা য়াওবা ঈরাং অসীগী চপচাবা, তুংকোইনা চৎনগদবা মখলগী ৱারোইশিন অমা পুরক্ননবা বি জে পিনা লুচিংবা সেন্টরগী এন দি এ লৈঙাক্না রোদমেপ অমা য়াৎপা লোইরে হায়না য়ুনিয়ন হোম মিনিষ্টর অমিট শাহানা ফোঙদোকখ্রে। বি জে পিনা লুচিংবা সেন্টরগী লৈঙাক অসীগী অহুমশুবা টার্ম লাকখিবা মতূং নুমিৎ চাম্মা শুরকপগী থৌরমগা মরী লৈননা পাঙথোকপা পাউগী মীফমদা অমিৎ শাহানা ৱাফম অসী ফোঙদোকখিবনি। ঈরাং অসীনা শোকহল্লবা কাঙলূপ অনীমক্কি লুচিংবশিংগা ফম্মিন্নদুনা তুংকোইনা চৎনগদবা সোল্যুসন অমা পুরক্ননবা হোৎনবা মথৌ তাই। মসী নত্তনা অতৈ অতোপ্পা পাম্বৈ অমত্তা লৈতে হায়খি।

মনিপুরদা থোক্লিবা ঈরাং অসী মখা শমথরকপগী মরুওইবা মরমশিংগী মনূংদা ইন্দিয়া-মেন্মার অনীগী পোরস ওইরিবা বোর্দর অসীসু অমনি। ঙমখৈ পরিং অসীদা হৌজিক ফাওবগী ওইনা কিলোমিটর ৩০ শাংবা শম্বল খাবগী থবক লোইশিল্লে। লোগী ৱাংমদা ঙমখৈ লান্না চঙশীল্লকপা মীওইশিং থিংনবগীদমক ষ্ট্রেটেজিক ওইবা লোকেসনশিংদা সি আর পি এফ পার্সনেলশিং দিপ্লোই তৌদুনা লৈরি হায়বা ৱাফম মহাক্না থমখি।

ইন্দিয়া- ম্যান্মার বোর্দরগী কিলোমিটর ১৫০০ শাংবা মফমগী ফেন্সিং তৌনবগীদমক সেন্টরনা বদজেট এল্লোকেসন তৌদুনা লৈরে হায়না অমিট শাহানা ফোঙদোকখি। লৈবাক অনী অসীগী মরক্তা চৎনরম্বা ফ্রী মূভমেন্ট রিজিম লৌথোকখ্রবা মতূংসিদগীদি ভীসাগী মতেং নত্তনা চৎথোক-চৎশীন তৌবা য়াররোই হায়না হোম মিনিষ্টরনা মখা তানা ফোঙদোকখি।