মনিপুরগী হীংসাগী ঈরাং লোইশিন্নব হোৎনবদা ভিদিএফশিং মরুওইবা থৌদাং লৌহনবিয়ু:এসোসিয়েসন

ষ্টেট সেক্যুরিতি ফোর্স পার্সনলশিংগী মনুংদা লৈবা ভিল্লেজ ভলন্টিয়ার ফোর্সশিংনা মতম কয়াগী মমাঙগী ঙসীফাওবা মনিপুরগী চীঙ অমসুং তম্পাক্কী তোঙান তোঙানবা মফমশিংদা মীয়ামগী পুন্সি অমসুং লন-থুম ঙাক শেন্দুনা লাক্লি। হৌজিক মনিপুরদা থোক্লিবা হীংসাগী ঈরাং অসিদা ভি দি এফ পার্সনল ১০,০৫০ অসিদসু অহেনব শক্তি পীবিদুনা ইরমদম অসিদা মহৌশাগী ঈং-তপ্পা শক্তম হঞ্জিলহন্নব হোৎনবদা অচৌবা থৌদাং লৌহনবিয়ু হায়না ওল মনিপুর ভিদিএফ এমপ্লোয়িজ ৱেলফ্যের এসোসিয়েসনগী সেন্ট্রেল কম্মিটিগী পব্লিসিটি সেক্রেটরি য়ুম্নাম ইবোয়াইমনা থাদোকপা চেরোল অমনা হায়রি।

শাংলবা চহী তরামরি অসিদা ভি দি এফ পার্সনলশিং অসীনা নোংজু-নুংশা থিদনা কত্থোকপগা লোয়ননা লমদম অসিগী মীয়ামগীদমক থৌগল কয়া তৌদুনা লাক্লি। ঙসী ঙসীমকসু মনিপুরদা থোক্লিবা হীংসাগী ঈরাং অসিদা ভিল্লেজ ভলন্টিয়ার ফোর্সশিং অসিনা অঙম্বা থৌদাং কয়া লৌদুনা লাক্লবসু খূৎশূ খূৎলাইশিং য়াওনা অতৈ পীফম থোকপা ইনফ্রাস্ট্রকচর, ইক্বিপমেন্ট কয়া মপূংফানা পীবিদ্রি হায়রি।

লৈবাক্কী চিরবা তানফমসিদা তম্পাক্কী তোঙান তোঙানবা কৈথেল, অচৌ-অশাংগী ঈমূং-মনূংদা চগৌ য়েংহন্দুনা থোঙ্গাল ঙাকপা, শূমাঙ-থেল্লোং ঙাকপা থৌওং অসীদি হৌজিক ওইরক্লিবা ঈরাং অসিদা খ্বাইদগী চান্নদ্রবনি হায়বসি মরী লৈনবশিংনা খঙজীনবিবা ফৈ হায়রি।ইরমদম ঈমানা মীকপ মীরাওখোলনা নিল্লক্লব, মীশী-মীনা কয়া থোক্লব মতমসিদা লৈবাক্কী মরুওইবা থৌদাং অদু শরুক য়াজরগে হায়রক্লি।