মনিপুরদা ইল্লিগেল রিফ্যুজি, ইম্মিগ্ৰেন্ট মশীং থীঙমদনা থোমজীল্লক্লিবা কয়া অসী থিংনবা পান্দমদা ষ্টেট লেজিসলেটিব এসেমব্লিগী হৌজিক চত্থরিবা মীফমনা হাওস কম্মিটি অমা শেমদুনা য়েংশিলহনবদা য়েৎনবা লৈতনা য়ানবা পুরকখ্রে। হায়রিবা হাওস কম্মিটি অসিদা মনিপুরদা লৈরিবা কম্যুনিটি পূম্নমক্কি মীহূৎশিং য়াওহনবা হায়নসু য়ানখ্রে। ফুংয়ার এসেমব্লি কন্সটিট্যুয়েন্সিগী এম এল এ লৈসিও কৈশিংনা হীরম অসীগী মতাংদা কোল্লিং এটেন্সন মোসন অমা পুগৎলদুনা হায়, মনিপুরদা ইল্লিগেল মাইগ্ৰেন্ট চঙশীল্লকপগী চৈথেঙ খ্বাইদগী চাউনা মায়োক্নরগা হৌজিক খুদোংচাদবা ফীভম মায়োক্নরিবা মফম অসী কামজোং দিষ্ট্রিক্ট অসিনি।
ইম্মিগ্ৰেন্ট ৫০০০ হেন্না বাইওমেট্রিক কেপচর লৌখ্রে অদুবু মসীগী কান্নফম অমত্তা মথোঙ-মরম খঙদ্রি হায়খি। ম্যান্মারদগী চঙলকপা ইম্মিগ্ৰেন্ট মশীংদি নোংমা-নোংমগী হেঙ্গৎলক্লি। ম্যান্মারদগী চঙলকপা ইম্মিগ্ৰেন্ট ২০০০ হেনবা মীওইশিং হৌজিক অমুক মাঙখ্রে, মখোয়দু চান্দেল, চুরাচান্দপুরনচিংবা মফমশীংদসু চঙশীল্লকখিবগী পাউ অমত্তা লৈতবা মরম্না কদায়দা লৈখ্রবগে হায়বা চপ চানা খঙবসু ঙমদ্রি হায়খি।
খন্নবা অদুদা ওপ্পোজিসন লিদর ওক্রম ইবোবিসু শরুক য়ারদুনা, প্রাইম মিনিষ্টর মোদিগী মীৎয়েং মখাদা ইম্মিগ্ৰেন্ট খন্দোকনবা হাওস কম্মিটি অমা শেমলগনি তাবদা নুঙাইবি ফাওই হায়খি।
