মনিপুরদা থোক্লিবা হীঙশা অসীনা য়ূমথঙনরিবা আসামদা চাউনা চৈথেং মায়োক্নরবা য়াই: হিমন্ত বিশ্বা শর্ম

হৌজিক মনিপুরদা থোক্লিবা হীংশাগী ঈরাং অসীনা য়ূমথঙনরিবা আসামদা চাউনা চৈথেং মায়োক্নরবা য়াই হায়না আসামগী চিফ মিনিষ্টর হিমন্ত বিশ্বা শর্মনা ফোঙদোকখ্রে। মনিপুরগী অতৈ মফমশিং, মরুওইনা ইম্ফাল তম্পাক্তা মমাঙ চহী ২০২৩ গী মে থাদগী হৌরকখিবা হীংশাগী ঈরাং অসীনা অকনবা চৈথেং পীদুনা লাকখ্রবসু অসামগা মনিপুরগা তাইনরিবা জিরিবাম দিষ্ট্রিক্টতদি করিগুম্বা অমত্তা চৈথেং মায়োক্নরকখিবা লৈতবনি।

অদূম ওইনমক চৎলিবা চহী ২০২৪ গী জূন থাদা কুকি মিলিটেন্টশিংনা মৈতৈ ফূরুপকি লৌমী অমা ফাখ্রগা তমথীনা হাৎলমখিবা থৌদোক অদুগী মতূংদগী বোর্দর দিষ্ট্রিক্ট অসীদা অকনবা হীংশাগী ঈরাং মায়োক্নদুনা লৈরক্লি। হৌখিবা নবেম্বর ১১ দা চিন- কুকি- নার্কো টেরোরিষ্ট শিংনা বোরোবেক্রাদা লৈবা সি আর পি এফ পোষ্ট অমদা এত্তেক চত্থরকখিবদগী সি আর পি এফনসু খূৎ হল্লক্তুনা অকনবা মওংদা নোংমৈ কাপ্নখিবা থৌদোক্তা মিলিটেন্ট ১১ হাৎখি অদূগা নুমিৎ অদূমক্তদা মিলিটেন্ট শিং অদুনা অঙাঙ অহুম নূপী অহুম পূন্না মীওই তরুক ফাদুনা পুখ্রবা মতূংদা তমথীনা হাৎলগা তুরেলদা থাধরকপদগী ঈরাং অসী অমূক হেন্না কনশীল্লক্লিবনি।

মসীনা মরম ওইদুনা য়ূমথঙনরিবা অসামদা চৈথেং মায়োক্নরক্কনি হায়বগী চাউনা চিংনবা লৈরি। মসীনা মরম ওইরগা বরাক তম্পাক্তা পুলিস ফোর্স দিপ্লোই তৌবা হৌরে হায়না চিফ মিনিষ্টর হিমন্ত বিশ্বানা ফোঙদোকখি।