মনিপুর য়ুনিভর্সিটি ওফ কলচর অসী নেস্নেল য়ুনিভর্সিটিগী থাক্তা ওনখৎননবা থবক লেপ্তনা পায়খৎলি হায়না মনিপুরগী নিংথৌসু ওইরিবা রাজ্য সভাগী এম পি লৈশেম্বা সনাজাউবনা ফোঙদোকখ্রে। চৎলিবা থা অসীগী মাপন্দা হৌদোকখিবা, নুমিৎ নীনী চত্থগদবা অহুমশুবা ঈনাৎ কলচরেল কম লিটরেরি মিট, ২০২৪ হৌদোকপগী থৌরমদা অথোয়বা মীথূংলেন ওইনা শরুক য়ারদুনা ৱা ঙাঙখিবদা সনাজাউবনা ৱাফম অসী ফোঙদোকখিবনি। ইম্ফাল গী পেলেস কম্পাউন্দদা লৈরিবা মনিপুর ফীল্ম দেভলপমেন্ট সোসাইটিগী পেলেস ওদিটোরিয়মদা পাঙথোকখিবা লিটরেরি মিট হৌদোকপগী থৌরম অদুদা এম পি অসীনা মখাতানা হায়, কলচরেল মিট অসীনা য়ুনিভর্সিটি অসীদা তম্লিবা মহৈরোয়শিংগী টেলেন্ট কয়াদু ঊৎথোকচনবগী মরূওইবা খুদোংচাবা অমা ওইহল্লগনি।
য়ু জি সিগী রেকোর্দ মতূং ইন্না ইন্দিয়াগী ওইনা য়ুনিভর্সিটি ১,১১৩ লৈরিবা অসিগী মনূংদা কাঞ্চিপুরদা লৈরিবা মনিপুর য়ুনিভর্সিটি অসীনা ৪৮১ শুবনি। অদুগা অমুকসু, ইন্দিয়াগী য়ামখ্রবা য়ুনিভর্সিটিশিং অসীগী মনূংদা কলচরেল য়ুনিভর্সিটিদি শূপ্নগী অহুমখক্তমক য়াওরি হায়রি।
মনিপুর য়ুনিভর্সিটি ওফ কলচর অসীনা অহুমদুগী মনূংদা অনীশুবনি। ঐখোয়না ঈশাগী তোপতোপ্পা নাৎ কলচর হায়বদি তম্পাকখক্তগী নত্তবিদা চীঙ অমসুং তম্পাক্কি কম্পোজীৎ কলচর চাওখৎহন্ননবা হোৎনবা চুমগনি হায়না সনাজাউবনা ফোঙদোকখি।
