ষ্টেট অসীগী মফম কয়াদা মতম খরগী মমাঙদগী পম্প শিংদা পেট্রোল ফংনদবগী খুদোংচাদবা কয়া মায়োক্নরগা লাকখ্রবা চৈরকশিদা ষ্টেট লৈঙাক্কি কঞ্জুমর এফিয়ার্স ফুদ এন্দ পব্লিক দিষ্ট্রিব্যুসন দিপার্টমেন্ট না মীয়ামগী খুদোংচাননবা অখন্ননা থৌরাংশিং লৌখৎলকপগা লোয়ননা থা অসীগী ২৭ কি নুংথিলদগী তম্পাক্কি মফম অয়াম্বদা লৈরিবা পেট্রোল পম্পশিংদা দিজল অমসুং পেট্রোল মরাং কায়না ফংহন্দুনা ওপন সেল তৌবা হৌখ্রে।
মনিপুরদা মমাঙ চহীগী মে অহুমদগী চিন- কুকি নার্কো-টেরোরিষ্টশিংনা চত্থরক্লিবা লান অসীগী মনুংচন্না নেস্নেল হায়ৱেগী তোঙান তোঙানবা কুকি-জো কাঙলূপশিংনা খুন্দারিবা চীঙগী মফমশিংদা এক্সটোর্সনগী থবক থৌরমশিং মতম শাংনা চত্থরকপগী মথক্তা মীয়ামগী তঙায়ফদনা চঙবা পোৎলমশিং, দিজল, পেট্রোলগী পোৎলম অমসুং চান্ন-থক্ননবা পোৎলমশিং পুরকপা গারিশিংদা অকনবা এত্তেকশিং চত্থরক্তুনা দ্রাইভর হেন্দিমেন কয়ামরুম শোকহনখিবা, সেক্যুরিটিগী মীওইশিং ফাওবদা এত্তেকশিং চত্থরক্তুনা মীশী-মীনা থোকহনখিবা কয়ানা মরম ওইদুনা পেট্রোল পম্প শিংদা মীয়াম্না থাউ ফংদবগী চৈথেং মায়োক্নরগা লাক্লিবনি।
মসীগীসু মথক্তা হন্দক ষ্টেট অসীদা অকনবা নোং লেপ্তনা হৈথরকখিবগী মহয়না নেস্নেল হায়ৱেগী তোঙান তোঙানবা মফম কয়াদা লেন্দস্লাইদকি থৌদোকশিংনা মরম ওইদুনা পেট্রোল, দিজলগী পোৎলমশিং ফংনদনা লাকখিবনি। গারি পুদুনা লাকপা মীওইশিংখক্তদা থাউ ফংহনবগা লোয়ননা জেরি কেনশিং পুদুনা থাউ লৌবা লাকপশিংদদি থাউ পীখিদে। মতৌ অসূম্না নিয়ম- নিটি অমগী মখাদা সেক্যুরিটিগী মীওইশিংনা ঙাক-শেন্দূনা মীয়ামদা থাউ ফংহনখিবনি।
