মীওই লাখ ৪ হেনবনা মনিপুর কন্নবা খোঙচৎ চৎখ্রে, প্রাইম মিনিষ্টর, প্র সিদেন্টতা ৱারেপশিং থারগনি

ঙরাং মনিপুরগী মীওই লাখ মরি হেনবনা শরুক য়ারদুনা মনিপুর কন্নবা খোঙচৎ অমা ইম্ফালগী থাংমৈবন্দ থাউ গ্ৰাউন্দগী লমথাখ্রে। খোঙচৎ অদুগী মতূংদা ইম্ফালগী খুমন লম্পাক্তা লৈবা স্পোর্টস কমপ্লেক্সতা মীয়াম্না মীফম অমা পাঙথোক্তুনা তোঙান তোঙানবা ৱারেপ নিপান লৌখি। ৱারেপশিং অদু ইন্দিয়াগী প্রসিদেন্ট অমসুং প্রাইম মিনিষ্টরদা থাননবা থৌরাং তৌখ্রে।
কোর্দিনেটিং কম্মিটি ওন মনিপুর ইন্টিগ্ৰিটি (কোকোমি) না শীন্দুনা মীওই লাখ মরি হেনবনা শরুক য়ারদুনা পাঙথোকখিবা খোঙচৎ অদু অয়ুক্কি পূং মাপন চপ চানা তাবদা থাংমৈবন্দ থাউ গ্ৰাউন্দদগী হৌরগা খোয়াথোং নাগামপাল, বি টি রোদ, কংলাগী নোংচুপথংবা হোজঙ মথং-মথং লাক্লগা নোরথ এ ও সি, মিনুথোং তারক্লগা ইম্ফাল তুরেল পরীংগী অৱাং-নোংচূপথংবা মায়কৈরোমদা লাক্লগা খুমন লম্পাক মেইন ষ্টেদিয়মদা তারক্লবা মতূংদা মফম অদুদা মীয়ামগী ওইবা মীফম পাঙথোক্তুনা তোঙান তোঙানবা ৱারেপ নিপান অদূ লৌখিবনি। মনিপুর কনবা খোঙচৎ অদুদা ৱাংখৈ কেন্দ্রগী এম এল এ থাংজম অরুনকুমার অমসুং কৈশামথোং কেন্দ্রগি এম এল এ সাপম নিশীকান্তসু শরুক য়াখি
মনিপুরগী অতৈ এম এল এ, মিনিষ্টর শিংদি অমত্তা শরুক য়াখিদে। মীয়ামগী মীফম অদূনা মনীপুরগী শক্তম কায়বা য়ারোই, কুকি জো মিলিটেন্টশিংগা তৌনরিবা সূ খূদক্তা ৱিথদ্রো তৌগদবনি, ইন্দিয়ানা চত্থরিবা কাঙলূপ-ফূরূপ নাইবা থৌওং য়ানিংদে, এন আর সি এস খূদক্তা চৎনহন্ন বা থৌশিল পায়খৎলু হায়বনচিংবা ৱারেপ নিপাল লৌখি।