হৌখিবা শগোলসেন নুমিত্তা মশাগী য়ুমদগী থোকখিবদগী পুলিসতা কমপ্লেন্ট থাঙ্গত্তুনা পুলিস অথোরিটিনা থিনরগা লাকখিবা তামিলনাদু কংগ্রেসকি লুচিংবা অমা নুমিৎ নীনীগী মতূংদা মৈনা চাকথেক্লবা অশীবা হকচাং ওইনা ফংখ্রে। কে পি কে জয়াকুমার কৌবা কংগ্রেস লুচিংবা অদু য়ূমদা হঞ্জিল্লক্ট্রে হায়দুনা মচানূপানা হৌখিবা ইরাই নুমিত্তা অইবা চেরোল পীশীন্দুনা পুলিসতা কমপ্লেন্ট থাঙ্গত্তুনা, পুলিস অথোরিটিনা থিনরগা লাকখিবা মতূংদা মহাক মশাগী ফার্ম লেন্দদগী মৈ চাক্লবা হকচাং ওইনা ফংবা ঙমখিবনি হায়রি। মহাক তামিলনাদুগী টিরুনেলভেলি ইষ্ট দিষ্ট্রিক য়ুনিটকি কংগ্রেস প্রসসিদেন্ট ওইনা থৌ পুরিবা মীওইনি হায়রি।
মহাক্কী মীশী অসিগী মতাংদা থিগৎনবা পুলিস অথোরিটিনা স্পেসিয়েল টিম অহুম শেমখ্রে। মীওই অসিগী থৱায় য়াওদ্রবা হকচাং অদুগী মনাক্তা দাইং দিক্লারেসন অমসু পুলিসনা রিকোভর তৌখি। মদু মশামক্না তশেংনা ইরগা থম্লম্লিব্রা নত্রগা অতোপ্পা এসাইলেন্টশিংনা শেম-শাদুনা ইশিল্লগা থমজিনব্রা হায়বদুগী মতাংদসু পুলিসনা য়েংশিনবা হৌখ্রে হায়রি। মহাক কনাগুম্বা মীওই অমা নত্রগা মীওই খরনা লৌতূনদুনা মৈ থারগা হাৎলম্লিব্রা নত্রগা মথন্তা সুইসাইদ তৌজখিব্রা হায়বসিগী মরমদসু কূপ্না থিজিনবা হৌখ্রে।
চেরোল অদুদা হায়-প্রোফাইলগী মীওই কয়ামরূমগী লিষ্ট অমা য়াওবা মরম্না মশামক্না তশেংনা ইরগা থম্লম্বনি হায়বসি পুলিসনা কনফার্ম তৌরকপা তারবদি চপখৎকদবা মীওই মশীং য়ামগদৌরি হায়রি।
