মালেমগী আরচরি রেঙ্কিংদা ইন্দিয়ান আরচর দিপিকা কুমারিনা অহূমশুবা মফমদা হাইগৎলকপা ঙমখ্রে

মালেমগী আরচরি রেঙ্কিংদা ইন্দিয়ান আরচর দিপিকা কুমারিনা অহূমশুবা মফম কনবা ঙমখ্রে। হৌজিক মালেমগী ওইনা মশান্না মখল অসীগী রেঙ্কিংদা অনীশুবা মফম কল্লিবা য়ুনাইটেদ ষ্টেটসকি আরচরি শান্নরোয় কেসি কুফহোল গী হেক মথঙদা লৈদুনা অহুমশুবা মফম কনবা ঙমখিবনি।  য়ু এস শান্নরোয় কেসি কুফহোল না পোইন্ট ২৬৪.৫ ফংলি অদুগা দিপিকা কুমারিনা পোইন্ট ২৩৭.৫ ফংলি। মালেমগী ওইনা আরচরি মশান্না মখল অসীগী রেঙ্কিংদা খ্বায়দগী মকোকথোংবা রেঙ্কিংদা লৈরিবা অসী কোরিয়াগী লিম সিহয়োন নি। মহাক্কি পোইন্ট মশীংনা ৩০৫ নি। এসি ইন্দিয়ান রিকর্ভ আরচর দিপিকা কুমারিনা হন্দক মালেমগী খ্বায়দগী ইকোন-কোনবা রেঙ্কিংদা অহুমশুবা মফম কনবা ঙমখিবনি হায়রি। চৎলিবা চহী অসীগী অঙনবা শরুক্তা দিপিকা কুমারিনা অমুক হন্না আরচরি মশান্না অসীদা য়াওবা ঙম্লক্তুনা বাগদাদতা শান্নখিবা এসিয়া কপতা মেদল অমা লৌবা ঙমখিবনি।

হৌখিবা কুমশীং ২০২২ গী দিসেম্বরদা অঙাঙ অমা ফংজখ্রবি, মমা অমা ওইবগী মিংথোল ফংজখ্রবী দিপিকা কুমারিনা হৌখিবা চহী ২০২৩ দা পাঙথোকখিবা কম্পিটিসন মখল অমত্তদা শরুক য়াখিদ্রবা মতূংদা চৎলিবা কুমশিং ২০২৪ অসীগী অঙনবা শরুক্তা আরচরি মশান্না অসীদা নৌহৌননা চঙলক্তুনা শরুক য়ারকখিবনি। বাগদাদতা পাঙথোকপা এসিয়া কপ তা মেদল লৌরকখিবনি। মহাক মমাঙদা অহুম্লক ওলেম্পিক গেমশিংদা শরুক য়ারুরবী অমসু ওইরিবনি।মহাক চৎলিবা চহী অসীগী মে থাদা পাঙথোকখিবা য়েচিয়ন ২০২৪ হ্যুন্দাই আরচরি ৱারল্ড কপ ষ্টেজ-২ দা মরীশুবা মফমদা লৈখিবনি।

মশাগী চহী ৩০ শুরবী শান্ন রোয় অসীনা হৌখিবা পেরিস ওলেম্পিক্স তা মেদল লৌবা ঙমখিদ্রবসু মেক্সিকোদা শান্নখিবা আরচরি ৱারল্ড কপ ফাইনেলদা, হৌখিবা ওক্তোবরদা সিলভর মেদল ফংবা ঙমখিবনি।