মনিপূরদা হৌজিক মপান্দগী চঙশীল্লকপা কুকি- জো কাঙলূপকী খূৎলায় পায়বা নার্কো টেরোরিষ্টশিং য়াওনা কুকি- মিলিটেন্টশিংনা হৌখিবা মমাঙ চহীগী মে অহুমদগী চত্থরক্লিবা সেপরেট এদমিনিষ্ট্রেসন তানবগা মরী লৈনবা হীংশাগী ঈরাং অসী য়াম্না থুনা লাকশীন্ননবা সেন্টর অমসুং ষ্টেট লৈঙাক্তা তকশীল্লদুনা মনিপুরগী মশীং য়াম্লবা স্কুল, কল্লেজগী মহৈরোয়শিংনা অকনবা প্রোটেষ্ট রেলি অমগা লোয়ননা মনিপুরগী চিফ মিনিষ্টরদা অমসুং গভর্নরগা উনদুনা থা অসীগী মাপন্দা পীশীনখিবা মেমোরেন্দম শিং অদূ পূং ২৪ গি মনূংদা থবক্তা ওন্থোক্ননবা ৱাফম লুচিংবশিং অসীগা উনখিবা নুমিত্তুদা য়ান্নখ্রবসু পূং ২৪ গী মতম হেল্লবফাও থবক্তা ওন্থরক্তবগী মায়োক্তা য়াম্লবা মহৈরোয়শিংনা ঙরাং অকনবা প্রোটেষ্ট রেল্লি মখাতানা চত্থখ্রে।
মমৈথঙদা মহৈরোয় ১১ খঙ্গত্তুনা ইম্ফাল ৱেষ্ট দিষ্ট্রিক্টকি এস পিসু য়াওনা গভর্নরগা উনখি। অকোনবগী উনখিবা অদুদা গভর্নরনা হৌজিকমক্কি ওইনা মনিপুরগী চিফ মিনিষ্টরদা য়ুনিফাইদ কম্মান্দ গী চার্জ শিন্নবদা সেন্টরনা অয়াবা পীরক্ট্রি, মরম অদুনা মতম খরগা লৌখিগে, অকক্নবা মতমদি হৌজিকমক্কি ওইনা হায়বা ঙম্লোই হায়না ফোঙদোরকপদগী খোয়শাওনরবা মহৈরোয়শিংনা অকনবা খোল্লাউশিংগা লোয়ননা প্রোটেষ্ট তৌবা হৌরকপদা মদুবু কন্ট্রোল তৌননবা হোৎনবদা মহৈরোয়শিং অমসুং মনিপুর পুলিসনা মতেং পাংবা সেন্ট্রেল রেপিদ এক্সন ফোর্স (রাফ) কি মরক্তা চাউনা মূক্নবা থোকখ্রে।
মহৈরোয় ৭২ রোম সেক্যুরিটি ফোর্স কি ট্যার গ্যাস সেল অমসুং মোব বোম্না পানবদগী শোক্তুনা হোস্পিটালশিংদা পুখত্তুনা লায়কন্নখি। পুলিস পার্সনেল খরসু নূংনা পানবদগী শোকখি। টি জি হায়র সেকেন্দ রি স্কুলগী মহৈরোয় নূপীমচা অমদি অরুবা ফিভমদা শোকপদগী রিমসকি আই সি য়ু দা পুখত্তুনা ঙরাংদগী লায়কন্নরগা লৈরকখ্রবা মতূংদা হেন্না ফিভম লুশিল্লকপদগী লাঙ্গোলদা লৈরিবা শীজ হোস্পিটালদা রিফর তৌদুনা মখা তানা লায়কন্নরগা লৈরি।
