এসিয়ান দেভলপমেন্ট বেঙ্ক( এ দি বি) অমসুং মধ্য প্রদেশ ষ্টেট না অনিনা তোঙান তোঙানবা চাওখৎ খোঙথাঙগা মরী লৈনবা হীরমশিংদা পূন্না থবক পায়খৎমিন্নরকপগী চহী ২৫ শুরকপা সিলভর জুবিলিগা মরী লৈননা পাঙথোকপা ৱার্কশোপকী থৌরমদা লোক্তাক দেভলপমেন্ট ওথোরিটিগী মীহূৎশিং শরুক য়াখ্রে। তোঙান তোঙানবা এনভায়রনমেন্ট গা মরী লৈনবা ইস্যু কয়ামরুম লৌখত্তুনা থৌরমদুদা নৈনখিবগা লোয়ননা লোক্তাক পাৎকি শক্তম মপূংফানা কন্দুনা তুংকোইনা য়োকখৎনবা হোৎনবদা মতেং পাংবিনবা তকশীনখি।
টাজ লেকফ্রন্ট তা পাঙথোকখিবা নূমীৎ নীনীগী ৱার্কশোপ অদুদা তোঙান তোঙানবা ষ্টেট কয়াদগী লাকখিবা মীহূৎ কয়ানা শরুক য়াখী। ফাইনান্সিয়েল ইন্সটিট্যুসনশিং অমসুং এক্সপর্ট ওরগনাইজেসনশিংদগী লাকপা মীওইশিংসু থৌরমদুদা শরুক য়াখি। ক্লাইমেট রিসিলিয়েন্স অমসুং রিন্যুয়েবল ইনর্জিগী মরমদা খন্নখিবগী মথক্তা অর্বান দেভলপমেন্ট অমদি পব্লিক সেক্তর মেনেজমেন্ট নচিংবগী হীরমশিংদসু পাক সন্না খন্ন- নৈনখি।
থৌরম অদুগী সাইদলাইন ওইনা, ইথাই বেরেজনা লোক্তাক পাৎকী এনভাইরনমেন্ট কি শক্তমদা পীরক্লিবা ইথিলশিং অমসুং মফম অসীগী ইকো-সিষ্টেমদা থোকহল্লিবা নুঙাইতবশিংগী মতাংদা শুগাইবা ৱাফমশিং এল দি এগী চ্যেরমেন না ফোঙদোকখি। হৌখিবা কুমশিং ১৯৮৩ দগী হৌনা লোক্তাক হায়দ্রোইলেক্ট্রিক্ট প্রোজেক্ট থবক ওইনা পায়খৎলকখিবগী মরু ওইবা শরুক অমা ওইনা লাকখিবা ইথাই বেরেজ অসিনা লোক্তাক অমসুং মসীগী অকোয়বদা খুন্দারিবা মফমশিংগী ইকো- সিষ্টেমদা অমসুং খুঞ্জাশিংদা য়াম্না শাথিনা চৈথেং পীরক্লি হায়না এল দি এগী চ্যেরমেন মোইরাংথেম আস্নিকুমারনা ফোঙদোকখি।
