লেফটেনেন্ট জেনরেল উপেন্দ্র দ্বিবেদিনা ইন্দিয়ান আর্মিগী ভাইস চিফ ওইনা চার্জ লৌখ্রে

হৌখিবা কুমশিং ২০২২ গী ফেব্রুয়ারী থাদগী হৌজিক ফাওবা নোদর্ন আর্মী কম্মান্দগী কম্মান্দর ওইনা লৈরকখিবা লেফটেনেন্ট জেনরেল উপেন্দ্র দ্বিবেদিনা ইন্দিয়ান আর্মিগী ভাইস চিফ ওইনা ঙরাং চার্জ লৌখ্রে। হান্না অৱাংবা থাক্কী ফম অসী পায়রম্বা লেফটেনেন্ট জেনরেল সুচিন্দ্রা কুমারনা উধম্পুরদা বেজ তৌবা নোদর্ন কম্মান্দগী কম্মান্দর ওইনা চৎখিবদগী মহাক্না ফম অসীগী চার্জ লৌখিবনি হায়রি। দ্বিবেদিনা হৌজিক লৈরিবা ইন্দিয়ান আর্মি ওর্গনাইজেসন অসীদা সেনিয়রমোষ্ট ওফিসার অমা ওইবা মরম্না আর্মী চিফ ওইরক্নবগী লমজেলসিদা খ্বাইদগী মাঙজীল থাবা রন্নর ওইবগী খুদোংচাবা ফংলি।

মহাক্না চার্জ লৌদ্রিঙৈ মাঙওইননা নেসনেল ৱার মেমোরিয়েলদা চত্তুনা শ্রধাঞ্জলি কৎখি। সাউথ ব্লোক লোঞ্জদা পাঙথোকপা গার্দ ওফ ওনর য়েংশিনখি।মধ্য প্রদেসকি রেৱাদা লৈবা সাইনিক স্কুলগী এলুমনস অমা ওইরিবা দ্বিবেদি অসি নেসনেল দিফেন্স একাদেমি অমসুং ইন্দিয়ান মিলিটরি একাদেমিগীসু এলুমনস অমা ওইনা লৈরিবনি।

মহাক কুমশিং ১৯৮৪ দা ১৮ শুবা জম্মূ এন্দ কাশ্মির রাইফল্সতা কম্মিসন তৌখিবা জেনরেল অমনি। মহাক নোদর্ন অমসুং ৱেষ্টর্ন কম্মান্দশিংদা মতম শাংনা থৌপুদুনা লৈরম্বা জেনরেল অমনি।