লাইক মাইন্দেদ গ্ৰুপ ( এল এম জি) মনিপুরনা লমদম অসীগী কা হেন্না অৱাবা, খুদোংচাদবা মায়োক্নরবা ঈমূং অমসুং লন্নাই মীওইশিংদা মতেং পাংদুনা লাকপগী শরুক অমা ওইনা চুরাচান্দপুরগী ওল্ড বজারদগী হৌরকখিবা মনিপুরগী ঈরাং অসীগা মরী লৈননা লাঞ্জেন্নরক্তুনা হৌজিক মোইরাংগী রিলিফ কেম্প তা চঙজফম লৌদূনা লৈরিবা নিংথৌজম জিট সিংহগী চহী ১৪ রোমতমক ঙায়রিবী মচানূপী ভেলেন্টিনাগী অশোকপা খোঙ মখাতানা লায়েংনবগী মতেং ওইননবগীদমক, ঈমূং- মনূংগী খুদোংচাদবশিং অদুগী য়েংলগা এল এম জি না মফম অদুদা চত্তুনা শেল ওইনা লূপা লিশীং তরা পীদুনা মতেং পাংখ্রে।
নূপীমচা অসী মমাঙ চহীগী মে অহুমদা চিন-কুকি মিলিটেন্টশিংনা চুরাচান্দপুর ওল্ড বজারদা মৈতৈশিংগী য়ূম তুম্না মৈ থাদোক্তুনা তান্থোরকখিবা নুমিৎ অদুমক্তদা লাঞ্জেন্নরকপদা তুশিন্দুনা মখোঙদা শোকখিবদগী রিমস হোস্পিটালগী ফিজিকেল মেদিসিন এন্দ রিহেবিলিটেসন সেক্সন্দা ওপরেসন তৌদুনা লায়েংদুনা লৈরিবনি। ঈমূং অসী লাঞ্জেন্নরক্তুনা হৌজিক মোইরাংগী রিলিফ কেম্প অমদা খুদোংচাদবা ফীভমদা লৈরি হায়বা পাউ ফংবদগী এল এম জি গী থৌমীশিংনা চত্তুনা শেলগী তেংবাং অসি পীখিবনি হায়রি।
এল এম জি না পুকচেল চাউনা মতেং পাংদুনা খুদোংচাদ্রবা ঈমূং অদূগী মতেং পাংলকখিবা অদুবু ঙমখৈ লৈতনা থাগৎলদুনা, অৱাবা খুদোংচাদবা কয়ামরুম মায়োক্নরবা মনিপুর মীয়ামগীদমক এল এম জি না তুংকোইনা তেংবাঙবা ঙম্বা ওইরসনু হায়না ভেলেন্টিনাগী অপোকপীনা য়াইফা-মঙ্গোল আশির্বাদ পীরকখি হায়রি। তেঙবাং খোঙচৎ অদুদা এল এম জি গী সেক্রেটরি ওজিৎ সোরোকখাইবম, ত্রেজরর কুঞ্জকেশ্বর মংশাতাবম, পব্লিসিটি সেক্রেটরি রাকেস নাউরেম অমসুং অতৈ মরু ওইবা থৌমীশিংসু শরুক য়াখি।
