লৈঙাক্কা য়ানবা পুরকপদগী লৈখিদ্রব মীওই ৪গী হকচাং লৌদুনা অরোইবা মথৌ মঙম পাঙথোকখ্রে

হৌখিবা জনুয়ারি ১৮ দা কুকি মিলিটেন্টশিংনা লোন্না চঙশীল্লক্লগ তমথিবা মাওংদা নোংমৈনা কাপ্তুনা হাৎলমখিবা বিষ্ণুপুর দিষ্ট্রিক্কি মনুংদা লৈবা নিংথৌখোং খা খূনৌগী খুঞ্জা মরীগী হকচাংশিং অদু ষ্টেট লৈঙাক্কা য়ান্নব পুরকপদগী ঙরাং রিমসকি মোর্কতগী মীয়াম্না লৌরবা মতূংদা নিংথৌখোং খা খূনৌগী গ্ৰজিং গ্ৰাউন্দদা মীয়াম্না মপূংফাবা ঈকায়খুম্নবা ঊৎখিবগা লোয়ননা অরোইবা মথৌ মঙম পাঙথোকখ্রে।
ওইনাম বামোঞ্জাউ মৈতৈ (৬৭), ওইনাম মনিতোম্বা(৩২) অপোকপা লৈখিদ্রব ও বামোঞ্জাউ, থীয়াম সোমেন্দ্রো(৫৭), অপোকপা লৈখিদ্রব থিয়াম মনিবাবু অমসুং নিংথৌজম নবদ্বিপ (৪০), অপোকপা লৈখিদ্রব নিংথৌজম শ্যাম মৈতৈ মীহাৎকি মতাংদা শেমখিবা জে এ সী গা ষ্টেট লৈঙাক অনীগী মরক্তা য়ান্নরবা অমগী মখাদা থৱায় য়াওদ্রব হকচাংশিং অদু লৌদুনা অরোইবা মথৌ মঙম পাঙথোকখিবনি।

লৈখিদ্রবশিং অদুগী হকচাংশিং অদু ময়ূম মায়কৈ তম্না পুরকপগী লম্বীদা মশীং য়াম্লব মীয়াম্না ঈকায়খুম্নবা ঊত্তুনা লৈ-শূ কৎনখি। কুকি মিলিটেন্টশিংগা তৌরিবা সস্পেন্সন ওফ ওপরেশন লৈঙাকনা খুদক্তা হন্দোক্কদবনি হায়বা খোল্লাউনা মায়কৈ খূদীংমক নিনখি। কুকি মিলিটেন্টশিং তকথোক উ, আসাম রাইফলশিং লৌথোকখো, মনিপুরগী অপুনবা শক্তম কৈদৌনুংদা কায়বা য়ারোই হায়বা খোল্লাউ কয়ানা অতিয়াদা নিনখি। মীকপ মীরাওখোল কয়াগী মরক্তা হকচাংশিং অদু অরোইবা মথৌ মঙম পাঙথোকখি।