লাইক মাইন্দেদ গ্ৰুপ্না লৈখিদ্রবা সুরজগী ঈমূংদ মতেং পাংখরে

হৌখিবা মার্চ ৩১ গী অয়ুক পূং ৯.৩০ রোম তাবদা মণিপুরদা ব্রজ তাবা য়াওনা অকনবা নোংলৈ-নুংশিৎনা য়ূম কয়ামরূম হুমদোকখিবতা নত্তনা লমফেলপাত্তা লৈবা এগরিকলচর ওফিস মনাক্তা লম্বীদা খোঙনা চৎলিঙৈদা খঙহৌদনা ব্রজ তারকপদগী লায়কন্নবা নংদনা লৈখিদ্রবা কুম্বি সগোল পাত্তগী তেলেম সুরজ এলাইজ ইথোইবা মৈতৈ (১৪) অপোকপা তেলেম সুরচন্দ্র মৈতৈগী ইমুংদা লাইক মাইন্দেদ গ্ৰুপ্না অচা-অথক্কি পোৎলমশিং মতেং পাংখ্রে।
লৈখিদ্রবা নূপামচা অসী লমফেলপাত্তা এগরিকলচর ক্বার্টরদা লৈবা মখুরাগী মনাক্তা লৈরগা লাইরিক তমদুনা লৈবনি হায়রি। ব্রজ তারকপগী লাইবক থীবা থৌদোক অদুদা মহাক লৈখিদবনি। অসিগুম্বা লাইবক থীবা থৌদোক অদুগী পাউ সোসিয়েল মেদিয়াদা ভাইরেল ওইরকপদগী লূপ অসীনা ঈমূংগী অৱাবদা শরূক য়াবা ওইনা অচা- অথক্কি পোৎলমশিং মতেং পাংখিবনি। লায়রবগী পঙ্খৈগী মখাদা লৈবা ঈমূং অমা ওইবগী মথক্তা নোংমগী অফং-অফংবা থবকশিং শূ-নোম্লগা হিংজরিবা ঈমূং অসিদা সুরজগী থৌদোক অসীনা অৱাবগী মথক্তা হেন্না খুদোংথীবা অমদা তারকপগী ফীভম অসিদা এল এম জি না নুঙাইতবা ফাওই হায়রি।
মীওইবা ঐখোয়গী মথক্তা মহৌশাগী ওইবা খুদোংথীবা কয়ানা লাঙ্গোই চন্দুনা লৈরি। পুন্সি অসিদা অৱাবা খুদোংথীবনা শরুক মরি থোকপগী অহুম ওইরগা নুঙাইবনা শরুক আমখক্নি হায়নরিবনি। কনাগুম্বা মীওইশিংদদি মপুন্সি চুপ্পা হরাওফম নুঙাইফম খঙদনা পুন্সি লোমখিবা কোঙ্গায় য়াওরিবনি হায়না লূপ অসিগী লুচিংবশিংনা ফোঙদোকখি।