ইন্দিয়াগী ঙমখৈ মনূংচল্লিবা মনিপুরগী লমখৈ মনুংদা আইনগী ৱাংমদা কাঙলোন কায়না চঙশীল্লকখিবা ম্যান্মারিজ কয়ামরুম মশাগী মরমদমদা থিন্দোকখিনবা অকনবা খোঙথাং লৌখৎলি। মসিগী শরুক অমা ওইনা অহানবা তাঙ্কক্কি ওইনা ঙরাং কাঙলোন কায়না চঙশীল্লকখিবা ম্যান্মারিজ ইল্লিগেল ইম্মিগ্ৰেন্ট ৩৮ ম্যান্মার অথোরিটিদা শিন্নখ্রে হায়না মনিপুরগী চিফ মিনিষ্টর নোংথোম্বম বিরেন্না ষ্টেট অসিগী গভরনর অনুসুইয়া উইকেগা ইম্ফালগী রাজ ভবন্দা উনখিবদা পাউদমখ্রে। মোরেহগী গেট নম্বর ১ ফাওদুনা ইল্লিগেল ইম্মিগ্ৰেন্টশিং অদু অচান মীরায় নাইদনা, চেকশিন থৌরাং লৌখৎলবা মতূংদা ম্যান্মারিজ অথোরিটিদা শিন্নখিবনি হায়খি।
ম্যান্মার অথোরিটিনসু ইন্দিয়া মচা অমা ইন্দিয়ান অথোরিটিদা শিন্নরকখি হায়না গভরনর অনুসুইয়া উইকেগা উনখিবা অদুদা চিফ মিনিষ্টরনা ফোঙদোকখি।মণিপুরদা কাঙলোন কায়না চঙশীল্লকখিবা ম্যান্মারিজশিংগী বাইওমেত্রিক দাটা লৌবগী থবক লেপ্তনা চঙশীল্লি। কুমশিং ২০২১গী ফেব্রুয়ারী অমদগী হৌনা ম্যান্মারদা জুন্টা লান্মিনা লৈঙাক পায়শিনখিবদগী অকনবা হীংশাগী ঈরাং থোক্লকতুনা সিভিল ৱার থোক্লকতুনা অহীং-নুংথিল খায়দনা মীশী-মীনা থোকলকপদগী ম্যান্মারিজ কয়ামরুম মনিপুর অমসুং অৱাং নোংপোক্কি ষ্টেট কয়াদা চঙশীল্লকখিবনি।
অসুম্না ম্যান্মারিজ কয়ামরুম কাঙলোন কায়না চঙশীল্লকখিবা মরম্না মনিপুরদা নৌনা খুঙ্গং ৯৯৬ হেঙ্গৎলক্লি হায়না চিফ মিনিষ্টর অসিনা গভরনর অনুসুইয়া উইকেগা উনখিবা অদুদা ফোঙদোকখি। হায়রিবা খুঙ্গং কয়ামরুম অদু কুমশিং ২০০৬ তগী হৌজিক ফাওবগী মতমসিদা শেমগৎলকখিবনি হায়বসু খঙবা ঙমখ্রে হায়না চিফ মিনিষ্টরনা ফোঙদোকখি।
