মশীং য়াম্লবা ঈমা মৈরা পায়বীশিংনা মনিপুরগী শক্তম কায়হনবা য়ারোই, ইন্দিয়ানা মনিপুর মূত্থৎনবা হোৎনরকপসু য়ারোই হায়বা য়াওনা অকনবা খোল্লাউ কয়াগা লোয়ননা মৈরাগী রেল্লি অমা কুম্বি মায়কৈদা খুঙ্গং ১৫ গী ঈমাশিংনা চৎখ্রে। রেল্লি চৎলিঙৈগী চৈরক্তুদা শকখঙদবশিংনা নারোন্দা হাইজিল্লক্লগা কুম্বি পুলিস ষ্টেসনগী অৱাংদা মিটর ৩০০ দমক লাপ্না লৈবা এস দি ও ওফিস মৈ থাদোক্লম্লে। ওফিস অদুদা মৈ চাকখৎলকপা উরকপদা মীয়াম্না পুলিসতা পাউ পীবগা লোয়ননা মীয়াম অমসুং পুলিস পার্সনেলশিংনা মতম চানা কলহৌবদগী ওফিস বিল্ডিং অদু কা হেন্না অমাঙ- অতা থোক্লমগদবদগী কনবা ঙমহৌরে। অদূম ওইনমক লমহেন-তুহেনবা মীওইশিং অদুদি ফাবা ঙমহৌদ্রে হায়রি।
মৈরাগী রেল্লি অদূ মায় পাকহন্দননবা থৌওইনা শীনবা, রাজনিটিগী থৌইন্সিন মানবা থৌদোক অমনি হায়না মৈরা পায়বী ঈমাশিংনা পেন্দবা ফোঙদোক্নখি। কুম্বি এ সিগী এম এল এ ওইনা লৈরিবা এস প্রেমচন্দ্রসু থৌদোক থোকফমদা লাক্তুনা ফীভম য়েংশিনবগা লোয়ননা অথুবা মতমদা মরাল লৈবশিং ফাগত্তুনা অকনবা দন্দি পীগনি হায়খি। নুমীৎ মঙানিগী মনূংদা মরাল লৈবশিং ফাগত্তুনা অকনবা দন্দি পীগদবনি হায়না ঈমাশিংনা তকশীনখি।
ইন্দিয়ানা মনিপুরগী শক্তম মচেৎ তানা থুগাইনবা হোৎনরিবসি খূদক্তা লেপকদবনি, কুকি-জো মিলিটেন্টশিংনা লুচিংদুনা সেপরেট এদমিনিষ্ট্রেসনগী দাবী তৌরিবসি পীবা য়ারোই, মনিপুর মূত্থৎনবা ইন্দিয়ানা হোৎনরকপা য়ারোই হায়বা খোল্লাউ কয়াসু ঈমাশিংনা লাউখি।
