চৎলিবা থা অসীগী অনীগী নুংদাং পূং নিপাল্লোম তারকপদা চুরাচান্দপুর দিষ্ট্রিক্টকি লৈশন কুকি এরিয়ারোমদগী কুকি- মিলিটেন্টশিংনা থংননা লৈরিবা ককচীং দিষ্ট্রিক্টকি মনূংচন্না লৈরিবা তাংজেং খূঞ্জাও, সুগনু, নাপৎনচিংবা খুঙ্গংশিংগী অতিয়াদা দ্রোন অনী থাজীন্দুনা পাইশিল্লকপদগী বোম থাধরক্কদ্রা হায়বগী চাউনা মিপাইবা পোক্নদুনা মীয়াম শাফগদবা মফমশিংদা থৈদোক্তুনা লৈনখিবগা লোয়ননা অহীং তূম্নখিদ্রে হায়রি।
দ্রোন অনী থাজীন্দুনা পাইশিল্লকখিবা অদূনা চাউরাক্না মিনিট ২৫ রোম কোয়পাই পাইদুনা লৈখিবতা নত্তনা সুগনু, নাপৎ, তাংজেং খূঞ্জাও এরিয়াদা ঙাইহাক লৈতনা চঙশীল্লক্তুনা মতম শাংনা সর্ভে তৌদুনা, বোম থাদগদবা খুদোংচাবা মফম অমসুং তাঞ্জা য়েংবগী মওংদা লৈখিবা অদুদা খুঞ্জাশিং থৈদোক্তুনা শাফগদবা মফমশিংদা লৈনখি, অহীং তূম্নখিদ্রে হায়রি। দ্রোনশিং অদু মতম শাংনা কোয়পাই পাইদুনা লৈরম্লবা মতূংদা চুরাচান্দপুর দিষ্ট্রিক্টকি লৈসন মায়কৈরোমদা অমুক হন্না পাইশিনখি। মদুগী মতূংদা ঙরাং অয়ুকসু অতোপ্পা দ্রোন অমা অমুক হন্না সুগনু অমসুং তাংজেং এরিয়ারোমদা পাইশিল্লকপগী থৌদোক লৈখিবনি।
পনবা য়াই, হৌখিবা নুমিৎ মরী-মঙানিগী মতমসিদা চিন- কুকি নার্কো- টেররিষ্টশিংনা ইম্ফাল ৱেষ্ট দিষ্ট্রিক্টকি কদাংবন্দ, কৌত্রুক, কাংচুপ, সেকমাই নোংথোম্বন অমসুং ইম্ফাল ইষ্ট দিষ্ট্রিক্টকি য়াইঙংপোকপি এরিয়ানচিংবা মফমশিংদা দ্রোন এত্তেক কয়ামরুম চত্থরকপদগী য়ামদ্রবদা মীওই অনী শিখিবগা লোয়ননা মীওই ১৫ গী মথক্তা অশোক- অপন নংখ্রবনি।
