কুকি মিলিটেন্টশিংনা লেপ্পা লৈতনা নোংমৈ বোম কাপথরকপদা খুল ঙাকপা অমা শিরে, চাজেনবী য়াওনা মীওই কয়া শোক্লে

চৎলিবা থা অসীগী ১১ দগী কুকি মিলিটেন্টশিংনা লেপ্পা লৈতনা নোংমৈ বোম কয়ামরুম কাপথরকপদা খুল ঙাকপা অমা শিরে অদুগা চাজেনবী অমা য়াওনা মীওই কয়ামরুম  অশোক অপন নংলে। খ্বাইদগী নৌনা কুকি মিলিটেন্টশিংনা নোংমৈ বোম কাপথরকপগী থৌদোক ওইনা পুখাউ শান্টিপুরদা কুকি মিলিটেন্টশিংগী খুত্তা লৈখিদ্রবা মীওই অদুগী মমিং শগোলসেম লোয়া (২৫) অপোকপা শগোলসেম রঞ্জিৎ কৌই। মহাক ঙরাং নুমিৎয়ুংবা মতূংদা পূং ৩ লোম তারকপদা কুকি মিলিটেন্টশিংনা কাপ্পা নোংমৈ মরূনা থবাক্তা পানবদগী অরুবা ফীভমদা শোকপদগী ইম্ফালগী রাজ মেদিসিটিদা লায়কন্ননবা পুখৎলকখিবনি অদুবু অশোকপা অদুনা মরম ওইদুনা ঈ কা হেন্না থোকখিবদগী লায়কন্নবা নংদনা  লম্বীদা লৈখিদবনি। থৌদোক অদুদা নোংমৈনা পানবদগী অতোপ্পা মীওই মরিসু শোক্তুনা রাজ মেদিসিতিদা পুখত্তুনা লায়কন্নখ্রে।

হৌজিক ইম্ফাল ইষ্ট দিষ্ট্রিককি মনুংদা লৈবা থম্নাপোকপি, সনাসাবি, সবুংখোক খূনৌনচিংবা মফমশিংদা মখা তানা নোংমৈ কাপ্নরগা লৈরি। সিমোল চীংথক্তগী কুকি মিলিটেন্টশিংনা লেপ্পা লৈতনা নোংমৈ বোম কাপথরকপগী থৌদোক লৈরি। থৌদোক্তুদা সেনট্রেল সেক্যুরিতি ফোর্সকি পার্সনল অমসু অশোক অপন নংখি হায়রি। নাকন অমরোমদা, ইম্ফাল নোংচুপ পানাগী কৌত্রূক অমসুং কদাংবন মায়কৈরোমদা কুকি মিলিটেন্টশিংনা লেপ্পা লৈতনা নোংমৈ কাপথরকপগী থৌদোক অমদা থা মরিগী অঙাং  চাজেনবী অমা মশাগী ঈমূংদ লৈরিঙৈদা নোংমৈ মরূনা পান্দুনা শোক্লে হায়রি অদুগা মফম অদুদা খুল ঙাকপা মীওই অমসু শোকখি।

শোক্লবী মৌনহা অদু কদাংবন ময়ায় লৈকায়দগীনি, মমিং থিঙুজম কবিতা (৩০) মপূরোইবগী মমিং থিঙুজম উইলসন কৌই হায়রি। মহাক্কি  মনঙ্গন্দা নোংমৈ মরূনা পান্দুনা শোকপনি। থৌদোক্তুদা  শোক্লবা খুল ঙাকপা মীওই অদুনা রোহীৎ কৌবা অমনি হায়রি। মহাক্কী মমায়দা নোংমৈ মরূনা খেৎলগা চৎখিবনি হায়রি। মখোয় অনিবু হোস্পিতালদা পুখত্তুনা লায়কন্নখ্রে, কা হেন্না খুদোংথীনিঙিই ওইদ্রে হায়রি।