চৎলিবা থা অসীগী অমদা কুকি- মিলিটেন্ট শিংনা ইম্ফাল ৱেষ্ট দিষ্ট্রিক্টকি কৌত্রুক, কদাংবন্দ, সেঞ্জম চিরাং নচিংবা মফমশিংদা দ্রোন বোম্বিং এত্তেক চত্থরক্তুনা অমসুং স্নাইপর এত্তেক চত্থরক্তুনা মীচম অনী হাৎখিবা অদুগা মীওই কয়া অশোক- অপন নংহনখ্রবা মতূংদা সেপ্তেম্বর থা অসীগী তরুক্তসু নুমিদাং পূং তরারোম তারকপা মতমদা দ্রোন মরি মঙারোম মফমশিং অসিগী নোংথক্তা থাগৎলক্তুনা মিনিট ২০ লোম কোইপাই পাইদুনা লৈবদগী মফমশিং অদুগী মীয়াম কা হেন্না মিপাইবা পোকপদগী অহীং তূম্নদনা শাফগদবা মফমশিংদা চঙদুনা লৈনখ্রে হায়রি।
কাংপোকপী দিষ্ট্রিক্টকি কুকিশিংনা খুন্দাদুনা লৈরিবা বেথেল ভিল্লেজ রোমদগী কুকি- মিলিটেন্টশিংনা দ্রোন থাজীল্লকখিবা অদুদা কৌত্রুক, কদাংবন্দ, সেঞ্জম চিরাং নচিংবা মফমশিংদা খুল ঙাক্লিবা ভিল্লেজ ভল্লন্টিয়রশিংনসু খূৎ হন্দুনা দ্রোনশিং অদুদা নোংমৈ কাপখি। অদূম ওইনমক দ্রোনশিং অদু মফম অদূগী অতিয়াগী শরূক্তা মিনিট ২০ লোম কোইপাই পাইদুনা লৈরম্লবা মতূংদা মাঙখি হায়রি। নুমিৎ অদূগী নুংদাং পূং ১১ খরা হেল্লকপা অদুদসু বেথেল মায়কৈরোমদগী কুকি- মিলিটেন্টশিংনা অকনবা মওংদা অত্তৎ-অখম লৈতনা কৌত্রুক, কদাংবন্দ মায়কৈরোমদা নোংমৈ অমসুং বোমগী এত্তেক চত্থরক্তুনা মীয়ামদা অকি-তুজুংবা পোকহনখি।থোইদোকপা অশোক- অপন্দি য়াওখিদে হায়রি।
অমরোমদা, মনিপুরদা লৈরিবা মাপনশুবা অমসুং ২২ শুবা আসাম রাইফলসকি মহুৎ সি আর পি এফনা শিন্দোক্ননবা সেন্টরনা লৌখৎলকপা থৌরাং মখাদা দ্রোন কাপথবা ঙম্বা, দ্রোন্নাম হায়না খঙনবা খূৎলায়শিং অমসুং মদুবু নীংথিনা শীজিন্নবা হৈরবা এক্সপার্ট শিংগা লোয়ননা সি আর পি এফকি টিমশিং ইম্ফালদা থুংলখ্রে। দ্রোনশিং কাপথনবা থৌরাং তৌরে হায়রি।
