কুকি- মিলিটেন্ট শিংদা নুমিৎ মঙানি ফাওবদা খূৎ থাবা ঙমদ্রবদি মনিপুরদগী সেন্ট্রেল ফোর্স হনবিখ্রো:কোকোমি

ইম্ফাল ৱেষ্ট দিষ্ট্রিক্টকি কৌত্রুক্তা দ্রোন বোম্বিং এত্তেক য়াওনা অফবা মখলগী নোংমৈ শীজিন্নদুনা অকনবা এত্তেক চত্থরকখিবা অদুদা চেন্নরিবা কুকি- মিলিটেন্ট শিং অদুদা লাক্লিবা নুমিৎ মঙানি ফাওবগী মনূংদা খূৎ থাবা ঙমদ্রবদি মনিপুরদগী সেন্ট্রেল ফোর্স পূম্নমক হনবিখ্রো হায়না কোর্দিনেটিং কম্মিটি ওন মনিপুর ইন্টিগ্ৰিটি (কোকোমি) না অকনবা ৱাফম ফোঙদোকখ্রে।
ইম্ফালগী লম্ফেলপাত্তা লৈবা কোকোমিগী ওফিসতা পাঙথোকখিবা পাউমীশিংগা উনবগী থৌরমদা কম্মিটি অসীগী কোর্দিনেটর থোকচোম সোমোরেন্দ্রনা ৱাফম অসী ফোঙদোকখিবনি। ঙসী অয়ুক পূং ১১ দগী নুমিৎয়ুংবা পূং ১২ ফাওবা মীয়াম্না লম্বীদা থোক্লক্তুনা হ্যুমেন চেন শেম্লগা লৈঙাক অসীনা কুকি- মিলিটেন্টশিংগী মথক্তা খূৎ থাবা ঙমদবগী মায়োক্তা অমত্তা ওইনা খোল্লাউ লাউমিন্নসি হায়নসু সোমোরেন্দ্রনা মীয়ামদা আপিল তৌখ্রে।

থা ১৬ হেল্লক্লবা ফাওবদা কুকি- মিলিটেন্ট শিংনা দ্রোন বোম্বিং এত্তেক ফাওবা চত্থরক্তুনা লৈবাক্কি সোভরেন্টি, ইন্টিগ্ৰিটি অমসুং সেক্যুরিটিদা চাউনা শীংনরক্লবা ফাওবসিদা সেন্টর অমসুং ষ্টেট লৈঙাকশিংনা থৌশাদনা লৈরিবা অসিনা তাকপদি কুকি- মিলিটেন্টশিংনা চত্থরক্লিবা এত্তেক অসীদা লৈঙাক্কি খূৎ য়াওরব্রা হায়বসি মীয়ামগী পূক্নিংদা চিংনবা ফাওই হায়খি।