খেত্রিগাউ কেন্দ্রদা নফসাগী চেং মতম শাংনা ফংহন্দবগী মায়োক্তা এম এল এ নুরুল হাসন্না লুচিংদুনা ইম্ফাল ইষ্ট দি সিদা থোমজীনখ্রে

ইম্ফাল ইষ্ট দিষ্ট্রিক্টকি খেত্রিগাউ কেন্দ্রদা মমাঙ চহীগী নবেম্বর থাদগী ঙসীফাওবগী ওইনাকেন্দ্র গী পীফম থোকপা নফসাগী চেং ফংহন্দবগী মায়োক্তা কেন্দ্র অসীগী এম এল এ শৈখ নুরুল হাসন্না লুচিংবা মীয়াম্না থা অসীগী ২৩ দা পোরোম্পাত্তা লৈরিবা ইম্ফাল ইষ্ট দিষ্ট্রিক্ট কি দিপ্যুটি কম্মিস্নারগী ওফীসতা রেল্লি অমা খোঙনা চত্তুনা থোমজিনখ্রে।
নেস্নেল ফুদ সেক্যুরিটি এক্ট ২০১৩ গী মখাদা মীয়ামদা ফংহল্লিবা চেং অসী হৌখিবা থা নিপান অসীদা কেন্দ্র অসীগী পীদনা লৈরি। মনিপুরগী অতৈ কেন্দ্রশিংগীদি দ্যু অমত্তা লৈহন্দনা থা খূদিংগী চাং নাইনা নফসাগী চেং পীরগা খেত্রিগাউ কেন্দ্র অসীগী থা নিপানগী চেং ফংহন্দ্রিবা অসি কেন্দ্র অসীগী এম এল এ বু লৈঙাক অসীনা করিগুম্বা মওং অমদা তোঙান্না নাথৈদুনা থম্লবগুম তৌরে। মশীদি য়াম্না লৈবাক মচা তাদবা মতৌনি, খ্বায়দগী লাইবক থীবনি হায়না এম এল এ শৈখ নুরুল হাসন্না ফোঙদোকখ্রে।
নুমিৎ মরিনিগী মনূংদা ষ্টেট লৈঙাক অসীনা খেত্রিগাউ কেন্দ্র অসীগী নফসাগী চেং মীয়ামদা ফংহন্দবা তারবদি কেন্দ্র অসীগী মীয়াম্না অকনবা খোঙজং চঙশীন্ননবা শেম শারে হায়না এম এল এ অসিনা অকনবা ৱাফম ফোঙদোকখি। রেল্লি অদু খেত্রি অৱাং লৈকায়দা লৈবা এম এল এ গী ময়ূমদগী হৌরগা মশীং য়াম্লবা মীয়াম্না ইম্ফাল ইষ্ট দিষ্ট্রিক্টকি দি সি ওফিস ফাওবা লাকখিবনি।
মফম অদু য়ৌরবদা এম এল এ না মহাক্কি মীওই খরগা লোয়ননা মীয়ামগী মহুৎ শিন্দুনা দি সি উনবা চঙলকপদা দি সি মশা লৈরমদবদগী এ দি এমগা উনদুনা ৱারী শান্নখিবদা নুমিৎ মরিনিগী মনূংদা চেং ফংহল্লু হায়না তকশীনখি।
মদু থবক্তা ওন্থোক্ননবা দি সিগা তানরগা থবক তৌরগে হায়না এ দি এম্না ফোঙদোরকখি হায়রি।