খামেনলোককি লানফমদা থৱায়না পোন্থা পীখ্রবা অথৌবশিংগী নীংশিং খুভমদা হৈকৎ-লৈকৎ তমদুনা ঈকায়খুম্নবা ঊৎখ্রে

মমাঙ চহীগী জূন ১৩ দা কুকি মিলিটেন্টশিংনা লান্দারকপদা থৱায়না পোন্থা পীখ্রবা মৈতৈ ফূরূপকী অথৌবশিংগী নীংশিং খুভমদা হৈকৎ- লৈকৎ তমদুনা ঈকায়খুম্নবা ঊৎপগা লোয়ননা মখোয়গী থৱায়না তাইবং শেম্বা মপূগী মফমদা ঈংনা- চীক্না লৈরুনবা মীয়াম্না থৌনিজখ্রে।
থৌরম অদুদা পাম্বৈনা লুচিংবা য়ু এন এল এফকি এক্তিং চ্যেরমেন এম নোংয়াইনচিংবা পার্টি অসীগী মকোক থোংবা কয়াসু শরুক য়াখি। ঈরমদম কনবা লূপ ( ইকল) না মরূওইবা থৌদাংশিং লৌদুনা শীনখিবা থৌরমদুদা তোঙান তোঙানবা মফমশিংদা লৈরিবা ক্লবশিং, শক্নায়রবা মীওইশিং, মৈরা পায়বী লূপশিংগী থৌমীশিং, সি এস ও কয়াদগী লাকপা মীহূৎশিংশু য়াওখি।
নোংশুম কম্যুনিটি হোলদা পাঙথোকখিবা থৌরমদুদা শরুক য়াখিবশিংনা হৌখিবা চহীগী জূন ১৩ গী লানফমদা থৱায়না পোন্থা পীখ্রবা অথৌবা তরাগী মফমদা হৈকৎ- লৈকৎ তমদুনা ঈকায়খুম্নবা ঊৎখিবনি। কুকি কাঙলূপনা চত্থরকপা জিও পোলিটিক্স তা মৈতৈনা য়েৎলক্কনি হায়বগী অকিবা, চিংনবা লৈবদগী মৈতৈশিংদা লান্দারকপনি। থৌওং অসী কুকিশিংনা চত্থরক্কনি হায়বসি মৈতৈশিংনা কৈদৌনুংদা খল্লুবা লৈতে। মখোয়না জিও পোলিটিক্স তৌদুনা অশানবা মীৎয়েং অমগী মখাদা মৈতৈশিং মপাঙ্গল শোন্থহন্দবা য়াদে হায়দুনা চত্থরকপনি হায়বা ৱাফম এম নোংয়াইনা ফোঙদোকপগা লোয়ননা কুকিশিং মপূংফানা মায়থীবা পীদ্রিফাওবা খোঙজং অসীদগী খোঙফম অমত্তা হন্দোকখিরোই হায়না মহাক্না মখা তাখি।