মনীপুরগী পুৱারিগা তৎন-থানবা য়াদনা লৈরক্লবা, ইম্ফাল ময়োলদা লৈরিবা খ্বাইরম্বন ঈমা কৈথেল অসী ইন্দিয়ান কন্সটিট্যুসনগী আর্টিকল ৫১ এ অমসুং আর্টিকল ৪৯ গী মখাদা লিভিং কলচরেল হেরিটেজ সাইট অমা ওইনা লাউথোকপীনবা রাজ্য সভাগী এম পি নিংথৌ লৈসেম্বা সনাজাউবনা ঙরাং রাজ্য সভাগী মীফমদা য়ুনিয়ন লৈঙাক্কি অকনবা মীৎয়েং চিংশিনখ্রে।
রাজ্য সভা মীফমগী জেরো অৱারগী খুদোংচাবা লৌরদুনা মনিপুরগী রাজ্য সভাগী এম পি সনাজাউবনা সভাগী লুচিংবা কয়াগী, মরুওইনা য়ুনিয়ন লৈঙাক্কি অকনবা মীৎয়েং চিংশিল্লদুনা ফোঙদোকখিবদা, এসিয়া মহাদেশকি ওইনা নূপীশিংখক্ত গী ওইবা খ্বাইদগী লিরবা কৈথেল অসীদা পোৎফম ফম্বী ঈমাশিং, ঈচে-ঈচলশিংনা, লোইলম শন্দোকপা লাক্তুনা ইন্দিয়াদা চঙলকখিবা ব্রিটিসকি শূপ্নম সাসন অমসুং মনিপুরগী মীয়াম্বু নমথদুনা, মখোয়গী খোঙয়াগী ঊফূলদৌনা থম্ননবা চত্থরকখিবা লৈঙাক সাসনগী মায়োক্তা লেপ্তুনা অকনবা ঈহৌ, খোঙজং কয়ামরুম চঙশীন্দুনা মীয়ামগী রাইট টু লাইফ, ফ্রীদম ফংননবা চঙশীন্দুনা লাকখিবা অসী মালেমগী মীয়াম্না খঙনরবনি।
ঈং কুমজা ১৯০৪ অমসুং ১৯৩৯ দা নূপী লান হৌরক্তুনা মতম অদুগী মওং-মরীল নাইদ্রবা ব্রিটিশ সাসনগী মায়োক্তা অকনবা লালহৌ চত্থরক্তুনা মীয়ামগী হিংবগী মমল লৈহন্ননবা থবকশিং পায়খৎখি। মদুদা ঈমা-ঈবেল কয়া অশোক- অপন মায়োক্নখিবনি।কয়া অমনা শিখ্রবনি হায়খি। অসিগুম্বা মালেম পূম্বনা খঙনরবি খ্বাইরম্বন্দ ঈমা কৈথেল অসী লিভিং কলচরেল হেরিটেজ সাইট অমা ওইনা য়ুনিয়ন লৈঙাকনা লাউথোকপিয়ু হায়না মহাক্না অকনবা মওংদা পুখত্তুনা তকশিনখিবনি।
