আম আদমি পার্টিগী নেস্নেল কনভিন্নর অমসুং দিল্লিগী চিফ মিনিষ্টর আর্বিন্দ কেজ্রিৱালনা মহাক্কি কোর্ট না পীরিবা ইন্টরিম বেলগী মতম লাক্লিবা জুন অমফাওবা লৈরিবা অদুদগী মখাতানা চয়োল অমগা শাংথনা পীবিনবা এপেক্স কোর্ট অসিদা মশামক চত্তুনা প্লি অমা পীশীন্দুনা হায়জখ্রে।
মহাক্কি হায়জা-চেরোল অদুদা আর্বিন্দ কেজ্রিৱালনা ফোঙদোকখিবশিংগী মনূংদা মরু ওইবশিংদি, মহাকপু এনফোর্সমেন্ট দিরেক্তরেটনা হৌখিবা মার্চ ২১দা ফাদুনা মে থাগী ১০ ফাওবা জুদিসিয়েল কষ্ট দিদা, টিহার জেলদা থম্লকখিবা মতমদুদা জেল অথোরিটিশিংনা মহাক্কি চেকশীন থৌরাং, মরুওইনা হকশেলগী মতাংদা নীংথীনা য়েংশিনবিখিদবা মরম্না হকচাংগী ফীভম য়াম্না শোকচীনখি হায়খি।মহাক্না সুপ্রিম কোর্ট তা মহাক্কি ইন্টরিম বেলগী মতম চয়োল অমত্তংগা মখাতানা শাংদোকপিনবা হায়জা-চেরোল পীশীল্লুরবা মতূং পঞ্জাবকি বথিন্দা দা পাউমীশিংগা উন্নখিবা অমদা কেজ্রিৱালনা ৱাফমশিং অদু ফোঙদোকখিবনি।
হৌজিক মহাক্কি হকচাংগি অরূম্বা কা হেন্না হন্থনা লৈরে। কনাগুম্বা মীওই অমগী মশাগী অরূম্বা অসী থা অমদা কিলো তরেৎ কি চাংদা হন্থরকপা তারবদি মহাক্কি হকচাংগী ফীভম য়াম্না খূদোংথীনিঙায় ওইরে তাকপনি। মরম অদুনা মহাক্কি দাক্তরশিংনা মহাক্কি হকচাং অদু তোঙান তোঙানবা টেস্ট কয়া তৌথোকপা মথৌ তারি হায়না প্রেসক্রাইব তৌরকপা মরম্না চয়োল অমগী মতম ইন্টরিম বেল অদু শাংদোকপিনবা হায়জা-চেরোল পীশীনখিবনি হায়না কেজ্রিৱালনা ফোঙদোকখি।
