কনৱার যাত্রা লম্বীগী পরীংদা অচা-অথক য়োনবশিংগী মশক মমীং থেত্তুনা থমগদবনি হায়রুবগী মায়োক্তা সুপ্রিম কোর্ট তা কমপ্লেন্ট থাঙ্গৎলকখ্রে

কনৱার যাত্রা মনূংদা লম্বীগী নাক-য়েত্তা অচা-অথক্কি পোৎলমশিং য়োল্লিবা মীওইশিংগী মমীং-মথা শেংনা ইদুনা থেত্তোক্কদবনি হায়না উত্তর প্রদেস লৈঙাক্না থোকখিবা দিরেক্তিব অমগী মায়োক্তা এন জি ও এসোসিয়েশন ওফ প্রোটেক্সন ওফ সিভিল রাইটস না সুপ্রিম কোর্টতা থাঙ্গৎলকখিবা কমপ্লেন্ট পেটিসন অমগী হিয়ারিং চত্থবা হৌখ্রে।

এপেক্স কোর্ট অসীগী জষ্টিস রিসিকেস রোই অমসুং এস ভি এন ভাটি অনীগী বেঞ্চতা হিয়ারিং অদূ চত্থখিবনি। হৌখিবা ইরাই নুমিত্তা যোগি আদিত্য নাথনা লুচিংবা য়ু পি লৈঙাক্না ষ্টেট অদুগী মফমশিং শীন্থুংনা চৎনগদবনি হায়না মুজাফরনগর পুলিসনা কনৱার যাত্রা রুটকি নাক-য়েত্তা অচাপোৎ য়োল্লিবশিংগী মমীং-মথা শেংনা ইদুনা থেৎকদবনি হায়না ওর্দর অমা থোকখিবা মতূংদা ষ্টেট শীনবা থুংনা মদু চৎনগদবনি হায়না য়ু পি লৈঙাক্না নৌনা ওর্দর অমা অমুক থোক্লকখিবনি।
মদুনা মরম ওইদুনা অচা অথক য়োনবা মীওই কয়া থবকশিং অদু থাদোক্তুনা চৎনখিবসু য়াওখ্রবনি। য়ু পি লৈঙাক্কি থৌওং অদু মুসলিম কাঙলূপ্তা অতম্ননা এত্তেক তৌবনি হায়না মায়কৈ কয়াদগী ষ্টেট রুলিং বি জে পি অমসুং চৎমিন্নরিবা মপাঙশিংবু য়ানিংদবা ফোঙদোক্নরক্লি।