কনাগুম্বা মীরেপ ওইগদবা মীওই অমত্তানা নোমিনেসন ফাইল তৌরকপা লৈত্রি

ইম্ফাল মার্চ ২২:মনিপুরগী ওইনা তাঙ্কক অনী থোক্না পাঙথোক্কদবা লোক সভাগি মীখল অসীগা মরী লৈননা থা অসিগী ২০দা চিফ ইলেক্তোরেল ওফিসার মনিপুরনা ইলেক্সন নোটিস থোকখ্রে, অদূম ওইনমক হৌজিকফাওবগী ওইনা কনাগুম্বা মীরেপ ওইগদবা মীওই অমত্তনা নোমিনেসন ফাইল তৌরকপা লৈত্রি হায়রি।
লাক্লিবা এপ্রিল ১৯ দা ইন্নর মনিপুর পারলিয়ামেন্টরি কন্সটিট্যুয়েন্সিদা মীখল পাঙথোক্কদৌরি অদুগা অমরোমদা আউটর মনিপুর পারলিয়ামেন্টরি কন্সটিট্যুয়েন্সিদা থা অদুমক্কি ২৬ তা ভোৎ থাধগনি হায়না মমাঙদা ইলেক্সন কম্মিসন ওফ ইন্দিয়ানা মার্চ ১৬ তা লাউথোক্তুনা লৈবাক অসিগী মীয়ামদা খঙহনখ্রবনি।
ইন্নর মনিপুর পারলিয়ামেন্টরি কন্সটিট্যুয়েন্সিগী ওইনা এসিষ্টেন্ট রিটর্নিং ওফিসার ওইরিবা মোহম্মদ ইমরান খানগী লম্ফেলদা লৈবা ওফিসতা চৎলিবা মার্চ থা অসীগী ২৭ কি অয়ুক পূং ১১ দগী নুমিৎ অসীমক্কি নুংথিলগী পুং ৩ ফাওবা নোমিনেসন ফাইল তৌরকপা য়াগনি হায়না লাউথোক্তুনা মরী লৈনবা খূদীংমক্তা খঙহনখ্রবনি। মীখল অসীগা মরী লৈননা চিফ ইলেক্তোরেল ওফিসার মনিপুরগী মীৎয়েং মখাদা পোল্লিং ওফিসিয়েলশিংগী ট্রেনিংশিংশু তাঙ্কক নাইনা পাঙথোকপা হৌখ্রে।
চৎলিবা থা অসিগী ২২ অমসুং ২৩ দা অয়ূক্তগী হৌরগা নূমীৎয়ুংবা মতূং ফাওবা প্রিসাইদিং ওফিসার অমসুং পোল্লিং ওফিসারশিংগী ওইনা ট্রেনীং পীগনি। সি ই ও মনিপুরনা ইলেক্সন দ্যুটি পীননবা ওর্দর ইস্যু তৌখ্রেবা প্রিসাইদিং ওফিসার ৪০,পোল্লিং ওফিসার ৫৩ থা অসীগী ২২ দা ট্রেনীং পীগনি হায়না খঙহনখিবনি।