কমলবাবুগী মরী-মখোঙ থিগৎলিবা কম্মিটিগী মখাতাবা রিপোর্ট দিসেম্বর ১৯ ফাওবদা পীখৎলক্নবা মনিপুর হায় কোর্টনা খঙহনখ্রে

হৌখিবা নবেম্বর ২৫দা লৈমখোংদা লৈরিবা ৫৭শুবা ইন্দিয়ান আর্মিগী মাউন্টেন দিবিজন হায়রগা খঙনরিবা আর্মি গী রেদ সিল্ড দিবিজন্দা থীকাগী থবক শূবা য়েংশিনবা চঙখিবা আসামগী কছার দিষ্ট্রিক্ট মনূং চন্না লৈরিবা গোসাইপুরদগী লাইশ্রম কমলবাবুগী অশেংবা মরী-মখোঙ, লংলা- লংজিন হৌজিক ফাওবদা খঙবা ঙমদনা লৈরি। মহাক্কি অশেংবা মরী- মখোঙ খঙদোক্নবা পান্দমদা হায় কোর্ট ওফ মনিপুরগী পাউতাক মখাদা শেমখিবা এনক্বারি অমদি ইনভেষ্টিগেসন কম্মিটি অদূনা হৌজিক ফাওবদা কমলবাবুগী মতাংদা থিগৎপদগী ফংলকখিবা রিপোর্ট থা অসীগী ১১ দা হায় কোর্ট অসীদা লানখৎখ্রে।

কম্মিটিগী রিপোর্ট অদূ হায় কোর্ট অসীগী জষ্টিস দি ক্রিষ্ণকুমার অমসুং জষ্টিস গোলমৈ গাইফুনসিল্লু কবুই অনীগী দব্বল বেঞ্চনা য়েংশিনখিবগা লোয়ননা অপেনবা ফোঙদোকখি। মসিগা লোয়ননা কম্মিটি অদূনা খরা হেন্না মখাতানা কূপথবা রিপোর্ট অমা পীরক্নবা অহেনবা থিজিনবগী থবক লৌখত্তুনা, লাক্লিবা দিসেম্বর ১৯ ফাওবদা মখাতাবা রিপোর্ট পীরক্নবা খঙহনখ্রে। কম্মিটি অসীগী ইনভেষ্টিগেটিং ওফিসার শিন্দোক্তুনা হেন্না অশেংবা অমসুং খূমাঙ চাওশীনবা মওংদা থবক লৌখৎনবসু খঙহনখি।

কাংপোকপিগী দিষ্ট্রিক্ট মেজিষ্ট্রেটনা লুচিংবা ইনভেষ্টিগেসন কম্মিটি অমা কমলবাবু মাঙখিবগী মতাংদা থিগৎলক্লগা কোর্ট অসিদা রিপোর্ট পীখৎলক্ননবা শেমখিবনি। হায় কোর্ট অসিদা কমলবাবুগী মনাওনূপানা হৌখিবা নবেম্বর ২৬ ময়াম্বগী মরী- মখোঙ খঙহনবিননবা ৱাকৎলকপদগী কোর্ট অসীনা পাউতাক পীদুনা কম্মিটি অদূ শেমখিবনি।